Larunbatean jokatu zen Gabirian 2026-04-13

Maddi Agirrek irabazi du Osinalde Saria

Jexux Mari Irazu

Maddi Agirre Epeldek irabazi zuen 54. Osinalde Saria joan den larunbatean Gabirian. Epaileek eta publikoak bat egin zuten epaian. Sei bertsolari gazte aritu ziren kantuan: Haira Aizpurua, Iruri Altzerreka, Eki Mateorena, Egiar Otegi, Maddi Agirre eta Janire Arrizabalaga, Ane Etxezarretak gaiak jarrita. Urtero gisa aurten ere Osinalde Elkartean 150 lagunetik gora bildu ziren finala jarraitzen. 



Bertso onenaren saria ere Gasteizera
Osinalde Sariko bertso onenaren saria ere Maddi Agirrek eraman zuen, zortziko txikian Iruri Altzerrekarekin egindako ofizioan kantatutako lehenengo bertsoagatik. Agirrek bigarren parte hartzea zuen aurten Osinalden eta lehenbiziko finala.

Osinalde Sariko bigarren postua Haira Aizpurua Ibargaraik eskuratu zuen. Saratarrak bi aldiz hartu du parte Osinalden eta bietan bigarren postua eskuratu du. Aurrekoan, publikoaren saria irabazi zuen. 

Bertsoa.eus-ek datorren astean jarriko du Osinaldeko hautaketa zabala.