Euskal Herriko Bertsozale Elkarteak antolatua, UEUrekin elkarlanean 2010-04-16

Aurten ere Bertsolantegia izango da

 Urteak dira Euskal Herriko Bertsozale Elkarteak eta UEUk elkarlanean ikastaroak antolatzen dituztela udan. Iazko hutsunearen ondoren, aurten ere Bertsolantegia antolatu dute, ekainaren 30etik uztailaren 2ra bitartean, Eibarko UEUren egoitzan. Aurtengo ikastaroak honako izenburu hau dauka: "Bertsormena. Landu sormenaren alderdi komunikatiboa". Helburua, berriz, honako hau da: "bertsoaren alderdi komunikatibo zenbaiten kontzientzia hartzea eta perfekzionatzea". Ikastaroa irakasle, bertsolari, idazle, aurkezle eta oro har hobeki komunikatu nahi duen edonori zuzenduta dago. Honako hau izango da egitaraua:

 EKAINAREN 30a, ASTEAZKENA
 Ideiak eta diskurtsoak sortzen
  9:00-11:00 Andoni Egaña: Ipuingintza, zutabegintza eta bertsotan gai bati bakarka kantatzea. Zer dute komunean? Zertan lagun dezake baten teknikak bestean?
  11:30-13:30 Xabi Paia: Nola landu irudimena? Ideien iturriez eta originalitateaz: almazena eta sorkuntza
  14:00 Bazkaria
  16:00-18:00 Ateliera: Andoni Egañak eta Xabi Paiak proposatutako ariketa praktikoak

 UZTAILAREN 1a, OSTEGUNA
 Komunikazio paratestualaz
  9:00-11:00 Jon Maia: Kantatzetik kantatzera. testuaren interpretazioa kanta eran. Doinuaren, erritmoaren eta bolumenaren kudeaketa
  11:30-13:30 Ander Lipus: Pertsonaiaren larrutik; gorputz adierazpena
  14:00 Bazkaria
  16:00-18:00 Jon Maiak eta Ander Lipusek proposatutako ariketa praktikoak

 UZTAILAREN 2a, OSTIRALA
 Jende aurrerako taktikak eta estrategiak
  9:00-11:00 Joxerra Garzia: Jende aurrean nola komunikatu hobeto. Taktikak eta estrategiak
  11:30-13:30 Joxerra Garzia: Jende aurrean nola komunikatu hobeto. ariketa praktikoak
  14:00-18:00 Bertso bazkari esperimentala: Julio Soto eta Beñat gaztelumendi. Ikastaroan zehar ikusi eta landutakoaren araberako ariketak egingo dituzte bertsolariek, gai-emaileak proposatuta

 Izena eman nahi izanez gero sartu UEUren web orrian. Matrikulatzeko epea maiatzaren 10etik ekainaren 20ra bitartekoa izango da. Prezio arrunta 163 eurokoa bada ere, ikasle, langabe eta erretiratuak 138 eurotan matrikula daitezke. UEUko bazkideak, berriz, 122 eurotan. Dena den, bestelako laguntza batzuk ere badaude. Hala, Bizkaiko Foru Aldundiaren laguntzari esker unibertsitateko ikasle langile eta langabeek (Bizkaian erroldatuek) dohakoak izango dituzte matrikula, joan-etorria eta ostatua. Horrez gain, unibertsitateko ikasle-ohi bizkaitar langabeek ere dohainik izango dituzte. Donostiako Udalak emandako laguntzari esker, berriz, donostiar orok dohainik matrikulatu ahal izango du. Gainera, beste hainbat udalek ere diru-laguntzak ematen dizkiete herritarrei. Laguntza hauen nondik norakoak ezagutzeko eta zein paper aurkeztu behar diren jakiteko sartuUEUren web orrian.

• 
•