Aita Zabalaren funtsa baliatuta 2010-05-06

Pello Mari Otañoren obra sarean jarri du Koldo Mitxelena Kulturuneak

Pello Mari Otañoren obra guztia sarean  jarri du Koldo Mitxelena Kulturuneak, Mendeurreneko ospakizunen harira. Antonio Zavalak (1928-2009) 1993 urtean argitaratu zuen Auspoaren Sail Nagusian Pedro Maria Otaño eta bere ingurua, bi liburukitan. Lanak Otañoren idazlanen eta bizitzaren gaineko informazioa biltzen du. Hurrengo urtean, 1994an, aipaturiko Bertso guziak kaleratu zuen helburu zehatza betetzeko asmoz:  "Irakurle askok haren bertsoak soil-soilik nahiko lituzkeela ez genuen dudarik egiten. Eta horixe da hemen eskaintzen duguna: Otañoren bertso eder, sentikor eta dotoreak, ezeren eranskinik gabe, liburu hau euskaldun bertsozale askorentzat oparirik bikainena izango delakoan".

Aita Zavalak, hil baino hilabete lehenago, Otañoren mendeurrena gogoratzeko libururen bat prestatzeko asmoa adierazi zuen. Hori dela eta, Joxemari Iriondo, Pello Esnal eta Jabier Kaltzakorta Auspoa taldeko partaideek Pedro Mari Otañoren libururen bat sarean argitaratzea proposatu zioten KOLDO MITXELENA Kulturuneko Liburutegiari. Hala, Antonio Zavalaren funts dokumentala kudeatzen duen liburutegiak bere gain hartu du lan hori.

Bertso Guziak liburuaz gain, Otañoren beste bi lan daude sarean:

Zerbait. 78 orrialde. Donostiako Victoriano Iraolaren moldiztegian argitaratua (1895)
Alkar: poesías escogidas de Pedro M. Otaño (en idioma euskaro). 80 orrialde. Buenos Aireseko Tipografía La Baskonian argitaratua (1904).