Xiberoa, Lapurdi eta Baxe Nafarroako Bertsulari Xapelketa 2010-11-13

Gaur jokatuko da finala Donibane Lohizunen

   Gaur bukatuko da Xiberoa, Lapurdi eta Baxe Nafarroako Bertsulari Xapelketaren aurtengo edizioa. Irailaren 18an hasi zen txapelketa, eta hiru kanporaketa eta bi finalerdiren ondoren honako bertsolari hauek iritsi dira finalera:

 Amets Arzallus
 Eneritz Zabaleta
 Sustrai Colina
 Odei Barroso
 Miren Artetxe
 Ekhi Erremundegi
 Joanes Etxebarria
 Xumai Murua

 Donibane Lohizuneko Jai-Alai pilotalekuan egingo da gaurko finala, arratsaldeko 17etan hasita. Bertsolariek 12na bertso puntuagarri kantatu beharko dituzte finalaren lehenengo zatian. Honako hauek dira ariketak:

 -Binaka, gaia emanda, 8ko handian hiruna bertso
 -Binaka, gaia emanda, 10eko txikian hiruna bertso
 -Binaka, gaia emanda, 6 puntuko motzean hiruna bertso
 -Kartzela: bakarka, hitz bat gaitzat hartuta 10eko handian bertso bat eta bakarka, gaia emanda, bi bertso doinu eta neurri librean

 Lehenengo zati honetan zortzi bertsolariak ariko dira. Ondoren bi puntuatuenek buruz burukoa jokatuko dute. Hauek 7na bertso gehiago kantatu beharko dituzte ariketa hauetan:

 -Binaka, gaia emanda, 8ko txikian hiruna bertso
 -Kartzela: Bakarka, hitza emanda, 9 puntuko motzean bertso bat eta bakarka, gaia emanda, hiru bertso doinu eta neurri librean

 Ariketa hauen ondoren jakingo da nor den aurtengo txapelduna. Txapela Mixel Itzainak jantziko dio. Aurten 30 urte beteko ditu Bertsularien Lagunak elkarteak eta bertan sortzaile lanetan aritu zen Mixel Itzaina. Gai-jartzaile eta epaile lanetan ere aritu izan da.

 Finalean bete egingo da pilotalekua ziurrenik, 1300 sarreratik gora saldu baitira jada.

• 
•