Zihara Enbeita izango da gonbidatua 2010-12-10

"Plazatik plazera" aste honetan Hitzetik Hortzeran

 Igande honetan ere, iluntzeko 21etan, Hitzetik Hortzera programa emango du ETB1ek. Aste honetan "Plazatik Plazera" izeneko ekimenak beteko du tarterik handiena. Joan zen astean Euskal Herrian izan ziren Alexis Díaz Pimienta repentista kubatarra Angel Luis eta Ruben Aguiar anaien musikaz lagunduta eta Mariela Acevedo eta Gabriel Luceno payadore uruguaitarrak. Saio dezente egin zituzten Euskal Herrian. Hitzetik Hortzerako kamarak Bilboko Alhondigan egindako saioan izan ziren. Bertan, inprobisatzaile amerikarrekin batera aritu ziren Sustrai Colina eta Fredi Paia. Saioko irudirik onenak eskainiko dituzte.

 Bestalde, Bizkaiko Bertsolari Txapelketak ere tarte handia beteko du. Alde batetik Gernikan joan zen igandean jokatutako finalaurrekoaren irudirik onenak emango dituzte. Honela gelditu zen sailkapena bertan:

 1.- Beñat Ugartetxea  513 punturekin
 2.- Fredi Paia        503,5 punturekin
 3.- Gorka Ostolaza    503 punturekin
 4.- Joseba Artza      492,5 punturekin
 5.- Oihana Bartra     484,5 punturekin
 6.- Xabier Enbeita    470 punturekin

 Gainera, platoan izango da Zihara Enbeita, txapelketako komunikazio arduraduna. Aurtengo txapelketaren nondik norakoak azalduko ditu. Eta hori ez da txapelketari eskainiko zaion une bakarra, Julen Gabiriak Gernikako kanporaketaren kronika egingo baitu.

 Jasotakoen atalean bertso-afari bat emango dute aste honetan: Iraetan Jon Maiak eta Iker Zubeldiak egindako bertso-afaria. Ia bi orduz aritu ziren kantuan giro ederrean, eta unerik onenak eskainiko dituzte programan.

 Ohiko atalak ere izango dira. Zuri-beltzekoan Jose Joakin Mitxelenak Gernikako arbolari botatako bertsoa izango da ikusgai. Eta, bukatzeko, hil berri den Xabier Letek ere izango du bere tartea. Urteetan aritu zen Hitzetik Hortzeran bertso zaharrak musikatzen, eta bere zenbait lan berreskuratuko dituzte.

• 
•