Bizkaiko Bertsolari Txapelketa 2010-12-16

Miren Amuriza: "Aurten inoiz baino lasaiago egongo gara denok"

 Euskal Herriko Bertsolari Txapelketan iritsi zen, beharbada, Miren Amurizaren gorakada. Finalaren atarian gelditu ondoren faboritoen multzoan ekin zion Bizkaiko Bertsolari Txapelketari, eta orain arte bete ditu pronostikoak. Dena den, finalera begira jarrita helburu kolektiboagoak lehenesten ditu. Hala, zortzi bertsolarien artean final on bat egitea da bere helburua. Aurpegi berri asko egoteak jende askori beldurra emango badio ere ez du uste aurten finala txarragoa aterako denik. "Kontrakoa: aurten inoiz baino lasaiago egongo gara denok".

 Orain arte egindako bi saioetan gustura gelditu da emaitzarekin. Dena den, ez omen da kanpotik zirudien bezain lasai egon, nahiz eta nerbio-puntu bat beti den ona. Lehenengo saioan, Igorren, lasaiago egon omen zen. Zornotzako finalaurrekoan gehiago sufritu omen zuen. Finalean giro ederra espero du: "nik uste dut gu pribilegiatu batzuk garela han 4000 lagunen aurrean egoteagatik". Hori aprobetxatu nahiko luke eta aurreko saioan baino lasaiago kantatu.

 Entrenamenduari dagokionez, aurten ez du bat-bateko entrenamendu berezirik egin. Astebururo saio bat baino gehiago izan dituenez, bertan egin ditu egin beharreko froga guztiak. Dena den, etxean paperaren aurrean lan egin du, eta hor landutakoa gero plazan erabiltzen saiatu da.

 Bertsoa.com-ek txapelketa hasi aurretik egindako elkarrizketa ikusgai dago hemen.

• 
•