Anjel Mari Peñagarikano elkarrizketatuko dute 2011-01-14

Oñatiko saioa, Ahobien gala eta Xenpelar Sariko finala emango ditu Hitzetik Hortzerak

 Aurtengo bigarren Hitzetik Hortzera saioa izango da ikusgai igande honetan ETB1en, gaueko 21etatik aurrera. Aste honetako saioan Xenpelar Sariketari eskainiko diote tarterik handiena. Batetik, aurtengo finaleko bertsoaldi honenak emango ditu programak. Honako bertsolari hauek kantatu zuten bertan:

 Agin Rezola
 Aitzol Barandiaran
 Alaia Martin
 Haritz Casabal
 Julio Soto
 Odei Barroso

 Azkenean Agin Rezolak jantzi zuen txapela, Aitzol Barandiaranekin buruz burukoa jokatu ondoren.

 Sariketa Errenteriako Xenpelar bertso-eskolak eta Ereintza kultur-elkarteak antolatzen dute, eta aurten Anjel Mari Peñagarikano omendu dute, 1980an berak jantzi baitzuen txapela. Aste honetan Peñagarikano bera gonbidatu dute platora. Gainera, Zuri-beltzekoan urte hartan kantatu zuen bukaerako agurreko irudiak eskainiko ditu Hitzetik Hortzerak.

 Zappinga ere Xenpelar Sariketari eskainiko diote. 1992an Jexux Mari Irazu izan zen txapeldun, eta edizio hartako irudiak emango dituzte aste honetako programan.

 Dena den, beste saio batzuk ere izango dira ikusgai aste honetan. Alde batetik, Algortako Casinoan urtero ospatzen den Ahobien Galako irudiak emango dituzte. Algortako Bertso Eskolak (ALBEk) urtero antolatzen du gala, bertsolaritzaren alde egindako lana saritzeko. Aurtengoa berezia izan da, 30 urte bete baitira Algortako Bertso Eskola sortu zenetik. Urte hauetan guztietan bertso eskolan lanean aritu diren bi pertsona omendu dituzte aurten: Trino Azkoitia eta Joseba Santxo. Galan, omenaldiaz gain, bertso-saioa ere egin zuten, honako bertsolari hauekin:

  Maialen Lujanbio
  Andoni Egaña
  Sustrai Colina
  Jon Maia

 Bestetik, Oñatiko saioa ere emango dute. Errege bezperan izan zen jaialdia, eta honako bertsolari hauek kantatu zuten bertan:

  Sebastian Lizaso
  Sustrai Colina
  Jexux Mari Irazu
  Amets Arzallus
  Iker Zubeldia
  Anjel Mari Peñagarikano

 Bukatzeko, aste honetan Txapelketa Nagusiko liburu eta DVD sorten zozketa egingo dute programan, eta "Bertsoz bertso" bideojokoa ere aurkeztuko dute.

• 
•