Terrorismoa Goratzea leporatzen die Auzitegi Nazionalak 2011-01-14

Oihane Pereak eta Josu Ormaetxeak gaur deklaratuko dute Madrilen

 Oihane Perea eta Josu Ormaetxeak gaur deklaratuko dute Madrilgo Auzitegi Nazionalean. Auzitegiak terrorismoa goratzea egozten die biei. Joan zen udako Gasteizko jaietan, Santiago Egunez, Blusa eta Nesken batzordeak antolatutako presoen aldeko ekitaldian kantatu zuten. Ekitaldiak Gasteizko Udalaren eta Herrizaingo Sailaren baimena bazuen ere, Ertzaintza bertan egon zen, eta hiru lagun identifikatu zituen. Ekitaldian Oihane Pereak eta Josu Ormaetxeak presoen izenak irakurri zituzten, senideak oholtzara igo zitezen. Horregatik epaituko dituzte.

 Atzo hainbat bertsolari, bertsozale, kultur eragile eta herritarrek babesa adierazi zieten bi bertsolariei, prentsaurreko batean. Bertsolarien jardunaren eta bertsolaritzaren aurkako "eraso"-tzat daukate epaiketa, eta "bide arriskutsua" zabaltzen duela uste dute. Gasteizko Blusa eta Nesken batzordeko kideek eta Etxeratek ere egoera "oso larria" dela uste dute.

 Gaur hainbat bertsozale eta kultur eragilek autobusak antolatu dituzte Madrilera joateko.

• 
•