Miren Ibarluzea gonbidatuko dute platora 2012-03-02

Mungia eta Lezoko saioak eskainiko ditu Hitzetik Hortzerak

 ETB1ean larunbat eguerdian emango dute Hitzetik Hortzera aste honetan ere, "Gaur Egun" albistegiaren ondoren. Aste honetako programan bi bertso-saiok beteko dute tarterik zabalena. Alde batetik, Beñat Ugartetxeak eta Igor Elortzak Mungiako Erreka jatetxean egindako bertso-afaria eskainiko du aste honetako saioak. Librean hasi baziren ere Taket Bertso Eskolako kideek gidatuta osatu zuten bigarren zatia. Besteak beste, Beñat Ugartetxea Lazkao Txikiren paperean jarri zuten Igor Elortzari galderak egiten entzuleen gozamenerako. Bertan izan zen Miren Ibarluzea, eta platotik kontatuko du han bizi izandakoaren berri.

 Beñat Ugartetxeak Lazkao Txiki imitatu zuela aprobetxatuz Joxe Migel Iztueta bera izango da protagonista "Zapping"-ean.

 Bigarren bertso-saioa Lezokoa da. Joan zen larunbatean urteroko saioa egin zuten bertan Mañontzi Bertso Eskolak antolatuta. Anjel Mari Peñagarikano, Aitor Mendiluze, Jon Maia eta Aitor Sarriegi jardun ziren kantuan, eta saioko unerik distiratsuenak eskainiko ditu Hitzetik Hortzerak.

 Bukatzeko, "Zuri-beltzekoa" atalean Arozamenak tabakoari kantatutako bertsoak emango dituzte aste honetan.

• 
•