Gaur Deba, Lesaka, Mallabia, Zornotza, Sopela, Bergara eta Irunen 2012-03-09

Dozena bat bertso-emanaldi izango dira asteburu honetan

 Bertso-saioz beteta dator asteburu hau ere. Denera ia dozena bat bertso-emanaldi daude iragarrita. Gaur bertan izango da non gozaturik. Deban bertso-afaria egingo dute Sebastian Lizaso eta Andoni Egañak.

 Lesakan "A las nueve en el Faisan" liburuaren aurkezpena izango da. Bertan Julio Soto, Alaia Martin eta Fredi Paia ariko dira bertsotan, Xabier Silveira gidari dutela.

 Mallabiako Izar Gorri elkartean Iban Urdangarin eta Iker Zubeldiak kantatuko dute afalostean. Beñat Ugartetxea ariko da aurkezle lanetan.

 Zornotzako Uxarte sagardotegian ere bertso-afaria izango da. Sustrai Colina eta Xabier Amurizak kantatuko dute bertan.

 Sopelan "Emakumea eta bertsolaritza" izeneko hitzaldia eskainiko dute Miren Ibarluzeak eta Fredi Paiak Kurtzio kultur etxean, iluntzeko 19:30etan.

 Bergaran bertso-afaria izango da Agorrosin jatetxean iluntzeko 21etan. Jon Maia eta Agin Rezola ariko dira bertsotan.
 
 Azkenik, Irungo Gaztetxean "bertso-sex afaria" ospatuko dute iluntzeko 21etan. Arkaitz Oiartzabal "Xamoa", Odei Barroso eta Amaia Agirrek kantatuko dute bertan.


 Biharko beste hiru saio daude iragarrita. Oiartzunen urteroko bertso-poteoa egingo dute iluntzeko 19etan hasita. Andoni Egaña, Iñaki Gurrutxaga eta Beñat Gaztelumendik kantatuko dute.

 Astigarragan bertso-jaialdia izango da kultur etxean, iluntzeko 20etan hasita. Uxue Alberdi, Ainhoa Agirreazaldegi, Amaia Agirre eta Onintza Enbeitak kantatuko dute, Unai Elizasu gai-jartzaile dutela.

 Zerainen, berriz, bertso-afaria izango da Ostatu tabernan, iluntzeko 21:30etatik aurrera. Amaia Agirre eta Nerea Elustondo dira bertan kantatzekoak.

 
 Iganderako emanaldi bakarra dago iragarrita. Berako kultur etxean "Bertsolari" filma eskainiko dute arratsaldeko 18etan. Ondoren solasaldia izango dute Asier Altuna zuzendariarekin.

• 
•