Aurtengoa hirugarren edizioa izango da 2012-05-30

Bota Eguna ospatuko dute larunbatean Elizondon

 Hirugarren Bota Eguna ospatuko da larunbat honetan Elizondon. Nafarroako Bertso Eskoletan dabiltzan helduen eguna izango da larunbatekoa. Aurten 112 ikasle aritu dira Nafarroan helduen taldeetan. Denera 14 talde daude gaur egun Lesakan, Beran, Larraunen, Baztanen, Leitzan, Iruñean, Malerrekan eta Lizarran.

 Asteburu honetako ospakizunen antolaketaz Baztango Bertso Eskola arduratuko da. Ostiralean hasiko da festa, Karlos Aizpuruak Arizkunenea kultur etxean emango duen hitzaldiarekin. "Bertsogintzan aritzeko zenbait gako: etxean lantzekoak" izeneko hitzaldia eskainiko du iluntzeko 20etan.

 Egun handia, dena den, larunbatekoa izango da, egun osoan izango baita zerekin gozatua. Eguerdiko 12etan hasiko da jaia, "komunetik komunerat" bertso jarduerarekin. Herriko plazatik abiatuko dira. Ondoren bertso bazkaria egingo da Kortarixar jatetxean. Bazkalostean, berriz, bertso eskoletako kideek egun horretarako prestatutako emanaldiak eskainiko dituzte.

• 
•