Durangaldeko kopla txapelketa 2013-06-10

Beñat Ugartetxea Durangaldeko 'Txapalaterue'

Durangaldeko Bertso-eskolak antolatuta eskualdeko bertsolarien arteko kopla txapelketa jokatu zen barikuan eta Beñat Ugartetxea mallabiarra gertatu zen irabazle, Igor Elortzarekin buruz burukoa jokatuta. Ugartetxeari Txapalatatea edo inbutua eman zioten, garaikur gisa, bera da beraz, Durangaldeko kopla txapelketako lehenengo 'Txapalaterue.'  300 lagun bildu ziren Durangoko Plateruenan.

12 bertsolari
Koplatan Durangaldeko 12 bertsolari aritu ziren, adin guztietakoak: Txaber Altube, Aitor Bizkarra, Miren Amuriza, Igor Elortza, Erika Lagoma, Gorka Lazkano, Juan Mari Areitio, Eneko Abasolo "Abarkas", Beñat Ugartetxea, Garikoitz Sarriugarte, Ander Aldazabal eta Ane Alegria. Zarauzko kopla txapelketaren ideia hartu dute oinarrian Durangaldean eta oso erantzun ona izan zuen ekitaldiak. Afaritarako 90 txartelak amaituta, afalostean aretoa ondo beteta ekin zioten bertsolariak, Txomin Magdalena eta Markel Onaindiaren esanetara. Lehen hiru saioren ondoren, sei pasa ziren aurrera, eta buruz burukoa gero. Erabakia publiko artean zeuden epaileek, publikoaren iritzia kontsultatuta.
Gutxi barru antolatzaileen testigantzak eta koplak eskainiko dizkizue Bertsoa.com-ek.

• 
•