Bertso-jaialdia Andoainen 2013-07-02

Udari ongi-etorria

Jai-giro bikaina izan ohi da Andoainen San Juan egunez. Arratsaldean jendetza biltzen da Goiko Plazan herri-kirolak ikusteko lehendabizi eta bertsoak entzuteko ondoren. Norberak beretik, arratsalde-pasa ederra egiteko aukera eskaintzen dute udari ongi-etorria eginez.

200 lagun inguru elkartu ziren Goiko Plazako pilotalekuko oholtzaren aurrean; pareko aulkietan batzuk, ertzeko harrizko eserlekuetan beste batzuk. Eguzkiak ongi berotutako eserlekuak, bide batez esanda. Etxeko zaharrenak eta gazteenak lehenak pilotalekura hurbiltzen. Bastoidunak esertzeko lekurik gabe ez geratzeagatik; eta besteak estali gabe geratutako frontoiko horman pilotan jolasteko.

Iluntzeko zazpietan hurbildu ziren bertsolariak oholtzara: Aitor Mendiluze, Sebastian Lizaso, Andoni Egaña, Miren Amuriza, Alaia Martin eta Odei Barroso. Beraiekin batera Josu Goikoetxea gai-jartzailea.

Ordu t'erdiko saioan denetik izan zen: umorea, hausnarketa, jolasa...  Sebastian Lizaso eta Alaia Martin prentsari begira jarri zituen Josuk, Diario Vasco eta Berria aztertzen hain zuzen ere.

Aitor Mendiluze jubilatuak eta Odei Barroso langabetuak plazan egin dute topo eta usoei jaten ematen hamaika kontu esateko aukera izan dute. Andoni Egaña erretzailea eta Alaia Martin erretzaile-ohiaren artean, nork tentatuko ote du nor?

Miren Amuriza eta Aitor Mendiluzek bertsoaldi polita osatu zuten aita-alaben paperean. Aitor banandu berritan Miren alabari tokatu zaio aita alaitzea.

Saioaren amaiera aldera umorez aritu zen Andoni organo-emaile lanetan. Atzeko bakoitzari zein organo eman ote dio Andonik?

Udari ongi-etorria egiteko modu ezin hobea Andoaingo bertso-jaialdia.

• 
•