Agenda 2013-08-30

14 saio izango dira asteburuan

Saioz betetako asteburua dator aste honetan ere. Gaurko lau saio daude iragarrita. Berriozarren arratsaldeko 18etan Erika Lagomak eta Eneko Fernandezek kantatuko dute. Elorrion Gazte Festak ospatzen ari dira eta bertso-poteoa eta bertso-bazkaria izango dira gaur eguerdian. Xabier Silveira eta Alaia Martin dira bertan kantatzekoak. Zarautzen Lizardi sariko bigarren kanporaketa jokatuko da iluntzeko 20:30ean Urpekoak Elkartean. Ane Labaka, Saioa Alkaiza, Sabin Iraztorza, Alazne Untxalo, Amaia Iturriotz, Mikel Iturriotz, Oier Aizpurua eta Xabi Igoak kantatuko dute bertan. Azkenik, Orioko Errusta tabernan "Bi Bala" emanaldia eskainiko dute Iñaki Gurrutxagak eta Aitzol Barandiaranek Julen Goikoetxearen laguntzaz. Bihar ere bete-betea dator agenda. Erandion jaialdia egingo dute Udaletxe plazan iluntzeko 20etan. Igor Elortza, Miren Amuriza eta Amets Arzallus jardungo dira kantuan gai-jartzaile Miren Loizaga dutela. Zornotzan bertso-afaria egingo dute iluntzeko 21etan Autzagane jatetxean. Maialen Lujanbio, Arkaitz Estiballes eta Xabier Amurizak kantatuko dute. Larrabetzun libreko saioa izango da eguerdiko 13etan Xabi Paya eta Xabier Amurizarekin Elexaldeko elizpean. Elgoibarren ere libreko saio bat dago iragarrita eguerdiko 13:30ean Nafarroa plazan. Xabier Arrizabalaga "Ziarda", Juan Mari Narbaiza eta German Meabebasterretxea dira bertan kantatzekoak. Ataungo San Gregorio auzoan festak dira eta bertso-saio musikatu bat antolatu dute bihar gaueko 22etarako. Manex Agirre, Oihana Bartra, Alaia Martin eta Iñigo Mantzizidor "Mantxi" ariko dira bertsotan Iker Iriarte gai-jartzaile dutela. Hazparnen "Hitza-hats" jaialdi bereziaren barruan bertso-saioa egingo dute eguerdiko 13:30ean Xuriatea Ostatuan. Odei Barroso eta Ortzi Idoate jardungo dira kantuan. Lantziegon bertso-afaria iragarri dute gaueko 22etarako frontoian. Orlando Arreitunandia eta Unai Bengoetxea ariko dira bertsotan. Azkenik, Artziniegan bertso-bazkaria izango da eguerdiko 14etan elkartean. Igandean beste bi saio izango dira. Izurtzan Iratxe Ibarra, Erika Lagoma eta Oihana Bartra ariko dira bertsotan. Beasainen, berriz, eguerdian Beasainmendi auzoan kantatuko dute Sebastian Lizasok eta Mikel Mendizabalek.

• 
•