Ostiralean jokatu zen Zarautzen 2013-09-08

Asier Azpirozek irabazi du Lizardi

Asier Azpiroz 'Azpi' zubietarrak (Gipuzkoa) irabazi du Lizardi Saria. Ostiralean jokatu zen  finala Zarautzen, sei bertsolari gazteren artean: Asier Azpiroz  eta Oier Aizpuruaz (Zarautz) gain, Ane Labaka (Lasarte-Oria), Amaia Iturrioz (Urretxu), Gema Urteaga (Beasain) eta Eneritz Artetxe (Azkoiti). Azken hau, Pello Ormazabalen ordez aritu zen, eta besarkada ere igorri zion agurrean. Asier Azpiroz eta Oier Aizpuruak oso saio berdindua egin zuten, eta zarauztarra bigarren gelditu zen puntu bakarrera. Bertso onenaren saria ere Oier Aizpuruak eraman zuen, zortziko handiko lehen bertsoagatik.  Felix Zubia aritu zen aurkezle lanetan eta Basarriren mendeurreneko ekitaldia izaki, irabazleari Iñaxi Etxabek jantzi zion txapela.

Final ona
Bertsolari gazteeek maila ona eman zuten Lizardiko finalean. Bost lan puntuagarri izan zituzten eta guztien entzun ziren lan politak. Zortziko handi, txiki, bina puntu, sei puntuan eta kartzela (bakarka hiruna bertso) aritu ziren. Sei puntukoa zen berritasuna eta bertsolariek ondo asmatu zuten neurri bihurrian ere. Hondartzako sorosleak, Hegoameriketara joan eta droga trafiko eskaintza jasotakoak, kirolari profesionalak... orotariko gaiak jorratu zituzten. Kartzelan berriz, honako gai honi kantatu zioten: "Iritsi da eguna, polizia zure etxean zai dago".

200 entzule inguru
Entzuleak ere urteroko legez erantzun zuen Lizardiko finalean. Modelo zineman 200 lagun inguru bildu ziren eta gogoz txalotu zituzten bertsolarien bertsoak.

• 
•