Lankuren 10. urteurrena 2013-10-22

Afari berezia izango da ostiralean

 Aurten 10 urte bete dira Lanku sortu zenetik. Bertsozale Elkarteak sortutako kultur enpresa da, bertsoa oinarritzat hartuta edozein kultur ekitaldi sortzeko eta antolatzeko giza baliabideak eta baliabide materialak kudeatzen dituena. Gaur egun bertso-saioak, haurrentzako ikuskizunak, musikatuak eta ikusentzunezkoak kudeatzen ditu.

 Urteurrena ospatzeko, ostiral honetan afari-jaialdi berezia izango da Itziarko Hostalean. Iluntzeko 21etan hasita, saio berezia izango da. Sarrerak 10 eurotan eskuratu daitezke www.lanku.com atarian edo Itziarko Hostalean bertan ostegunera bitarte.

 Afalostean, jaialdi berezia izango da. Xabier Amurizak Itziarri buruzko bertso-jarriak kantatuko ditu. Ondoren, Andoni Egañak, Sustrai Colinak eta Oihane Pereak bertso-saioa egingo dute Joana Itzainaren gaiekin. Bukatzeko, Oskar Estangak bat-bateko bertso musikatuak kantatuko ditu.

• 
•