Lankuk 10 urte bete ditu 2013-11-04

Lankuk hamargarren urteurren borobila

Lanku Bertso Zerbitzuak 10 urte bete ditu eta urteurrena ospatzeko ekitaldia egin berri dute Itziarren (Gipuzkoa). Afari bueltako ekitaldia izan zen. Xabier Amuriza, Andoni Egaña, Sustrai Colina, Oihane Perea, Oskar Estanga eta Joana Itzainak parte hartu zuten saioan. Jatetxean 150 lagun bildu ziren eta aretoa erabat beteta zela gozatu zuten gaua. Aste honetan urteurren ekitaldiko bertsoak izango dira Bertsoa.com-en

"Ospakizun borobila"
Ospakizun borobila atera zen Lankuren hitzetan. Xabier Amurizak Itziarri eta Lankuri buruzko bertso jarriak kantatu zituen; Joana Itzainak, Egaña, Colina eta Perea jarri zituen lanean gai ezberdinekin; eta emanaldi berezien adierazgarri, Oskar Estangak 'Bat-batean'  emanaldian ohi duen legez, bat-batean aritu zen, Kubako doinu batean oinarrituta eta segidillan gero. Bukatzeko Xabier Amuriza eta Oskar Estangak Pello Joxepe doinuan itxiera eman zioten ekitaldiari. Lankuk adierazi duenez, ekitaldian parte harte hartzaileak aukeratzeko orduan, herrialde, genero eta belaunaldien oreka mantendu nahi izan zuen, eta aldi berean, bertso jarri, bat-batako bertso  eta saio bereziez osatu ekitaldia, Lankuren errekorridoa erakutsi nahirik.

• 
•