Zumaia 2014-02-11

Elkartasun bertsoak

Elkartasun-jaialdia izan zen ostiralekoa. Zumaian gaztetxea behar eta herriko eraikin zahar bat okupatzeagatik auzitara bidali zituzten bi zumaiar gazte. Epaiketak eragindako gastuei aurre egiteko antolatu zuten saioa batik bat, baina bide batez bestelako elkartasuna eta babesa jaso zuten gazteek.

Saioa hasi baino ordu bete lehenago jendea ilaran zegoen kanpoaldean eta leporaino bete zen Aita Mari aretoa. Publiko gaztea, eta nabari zen hori giroan.

Maddi Gallastegik aurkeztu zuen jaialdia eta berarekin batera igo ziren oholtzara Beñat Gaztelumendi, Amets Arzallus, Igor Elortza, Maialen Lujanbio, Unai Iturriaga eta Jon Maia. Azken honek seinale zuen herrian ari zela kantuan. Behin baino gehiagotan eragin zituen entzuleen algarak bertako kontuez abestuta: zumaiarrak eta Zumaiako txokoak.

Elkartasun-jaialdia izan arren, saioa antolatzeko motiboak ez zuen gaietan eragin handiegirik izan. Saioaren amaierako kopla saioak agian gehiena; santaeskean aritu baitziren sei bertsolariak epaiketarako dirua atera asmoz.

Aktualitateak jarri zituen gai gehienak: nola ez, itsaso zakarra eta olatu erraldoiak , gaztetxeen egunerokoa edota Ukrainako egoera politikoa, besteak beste.

Baina hain ohikoak ez diren gaiak ere eman zituen Maddik. Horren adibide Beñat Gaztelumendi eta Unai Iturriagari jarri ziena. Tabernako barra ertzean goizeko ordu txikitan kokatu zituen bi bertsolariak. Gaia erraza ez izan arren ondo atera ziren atakatik.

• 
•