Argi Berri saria 2014-03-25

Aitor Irastortza zaldibiarra eta Aitor Salegi zestoarra ere Osinaldeko finalera

Aitor Irastortza zaldibiarra eta Aitor Salegi zestoarra ere Osinaldeko finalean izango dira, larunbatean Ordizian sailkapena eskuratuta. Osinalde sariketarako baliagarri den kanporaketa jokatu zen, Argi Berri saria, sei bertsolari gazterekin: Jokin Bergara (Eibar), Imanol Uria (Algorta), Aitzol Iturbe (Antzuola), Ortzi Murua (Azkaine), Aitor Irastortza (Zaldibia) eta Aitor Salegi (Zestoa). Igor Eguren gai jartzailearen esanetara jardun zuten gazteek eta koplak kantatzeko berriz, Ander Matxain eta Ainhoa Intxausti trikitilarien laguntza izan zuten. Argi Berri elkartean 60 lagun inguru izan ziren afaltzen, baina bertso saioa entzutera etorritako jendea gehituta, bete egin zen elkartea. Adin guztietako jendea elkartu zen; aurreko kanporaketan parte hartutako bertsolariak, aurreko urteetan Osinalde sariketan parte hartutakoak, bertsolari beteranoak… Hainbat belaunaldietako bertsolariek eta bertsozaleen bilgune izan zen Argi Berri larunbatean.

Finala Gabirian, apirilaren 12an
Aitor Irastortza zaldibiarrak eta Aitor Salegi zestoarrak ez ezik, Malen Amenabar Larrabetzuarrak eta Josu Oiartzabal azpeitiarrak ere lortua dute Osinaldeko finalerako txartela. Seikotea osatzeko, azken kanporaketa larunbat honetan jokatuko da Gabiriako Aztiri auzoan.

• 
•