Bardoak 2014 2014-03-31

"Harrapazank", "Bertze maldikoak" eta "Lepatanatuek 2" sailkatu dira finalera

 Asteburu mugitua izan dute Bardoek, bigarren fasea amaitzeko lau saio jokatu baitira. Leitzako "Harrapazank" eta Iruñeko "12 obario eta 11 pedrada" taldeek bi saio egin dituzte. Joanekoa ostiral gauean egin zuten, Iruñean. 70 lagun bertaratu ziren saioa jarraitzera. Itzulerako saioa atzo egin zuten, Leitzako Gaztetxean eta 60 bat bertsozaleren aurrean. Bertsoa.com-eko kamera bertan izan zen eta ikusgai dago saioko aukeraketa. Azkenean leitzarrek lortu dute finalerako sarrera.

 Igantzin "Zortziko Haundiena" talde lesakarra eta "Lepatanatuek 2" baztandarra aritu ziren bertso-afari formatuan eta 65 lagunen aurrean. Azkenean baztandarrak sailkatu dira finalera.

 Azkenik, larunbatean Iruñean aritu ziren bertako "Bertze Maldikoak" eta Baztan-Malerrekako "Etxeko kontuk" taldeak. 60 lagunen aurrean etxekoek lortu zuten finalerako txartela.

 Dena prest apirilaren 12rako

 Apirilaren 12an izango da Bardoak 2014 ekimena borobiltzeko festa, Lesakan. Arratsaldean finala egingo dute frontoian "Lepatanatuek 2", "Bertze Maldikoak" eta "Harrapazank" taldeek. Sarrerak salgai daude jada www.bertsosarrerak.eu atarian. Bazkideek, langabetuek eta 16 urtetik beherakoek 10 eurotan eskuratu ahal izango dituzte sarrerak eta gainerakoek 15 eurotan. Behin finala bukatuta, afaria egingo da Linddurrenborda sagardotegian, eta bertara joateko sarrerak ere salgai daude internetez.

 Bestalde, finalerako sarrerak beste hainbat herritan ere erosi daitezke: Lesakan, Beran, Leitzan, Lekunberrin, Etxarri-Aranatzen, Elizondon eta Iruñean.

• 
•