Uztapideren Mendeurreneko ektialdiak 2009-05-15

‘Uztapide bat-batean’ bertso antolologia aurkeztu dute, liburua eta CDa

Uztapide bat-batean bertso liburua eta CDa aurkeztu zuten atzo Zestuan, Nikolas Aldai eta Pello Esnalek egindakoa, Auspoa Sailak argitaratua, Euskaltzaindiako Herri Literaturako batzordeak egindako bileran aurkeztua. Duela urtebete, Uztapide gogoan elkarteko kideek Auspoara jo zuten milaka bertso eskuetan zituztela, eta hor sortu zen liburu eta CD hau argitaratzeko idea. Ekitaldian, Pello Esnal eta Nikolas Aldairekin batean, Xabier Euskitze, Joxe Mari Iriondo, Antton Aranburu eta Alazne Olaizola Zestuako alkatea izan ziren. 50 lagun inguru bildu zen ekitaldian.

Uztapide bat-batean 374 orrialdeko liburua da eta Uztapideren bertso eremu ezberdinak lantzen ditu, bapatekoak denak: Herriz herri, lagunarte giroko saioak, txapelketakoak, bertso jaialdietako bertsoak eta badu atal berezi bat ere: Zortzikoan maisu izenekoa, non Uztapideren gaitasuna aitortzen den neurri horretan. Nikolas Aldai egileak Uztapideren bapateko bertso bilduma izateak duen garrantzia nabarmendu zuen, eta era berean aitortu zuen gustora egindako lana izan dela. Pello Esnalek bere burua saltzen ez zuen bertsolaria izan zela esan zuen Uztapide, eta Baserri eta biak ikuspegi ezberdinen arteko elkarrizketa osatzen zutela. Euskitzek ekitaldi bukaeran lau bertso bota zituen.