Iñaki Murua - Elkarrizketa 2018-03-28

"Sinestea da kontua eta ekipoan lan egitea, elkar entzunez"

Azken 40 urteotako bertsolaritzan erreferentzialtasun handiko pertsona izan da Iñaki Murua (Gabiria, 1956). Jaioterrian debutatu zuen plazan 16 urte zituela, 1986ko Txapelketa Nagusian finalean kantatu zuen, bertsozale eta bertsolariek euren ardurapean antolatu zuten lehenengo hartan. Baita, 1989an ere. Bertsozale Elkartearen bultzatzaile izan da sorreratik eta azken 13 urteotan lehendakari ardura bete du. Egun, Mintzola Ahozko Lantegiko patronatuko kide da.

Elkarrizketa honetan, bere bertsolaritza bizitzako momentu eta oroitzapen giltzarriak kontatzen ditu, egoki kontatu ere. Bere lehenengo plazan, aitarekin batean egin zuen hartan, Iñakik aitari bota ziona, 1986ko finaleko aitortzak, "hau kostatu egiten zaidak aitortzea baina...", Bertsozale Elkarteko sorrerako intuizioen garrantzia eta etorkizuneko klabeak, gizarte eragile eta administrazioarekiko harreman ereduak... eta beste hainbat gogoeta benetan interesgarri, soseguz bezain zorrotz kontatuak.