Bernardo Atxaga eta Joxan Goikoetxearen hitzaldia 2018-04-26

Mende hasierako bertsolaritzaren sekretu bila Asteasun

 Bertsogintza ahoz aho transmititu izan da belaunaldiz belaunaldi. Baina ahoz ahoko transmisio horretan oraindik ere asko dira bidean galdutako izenak eta argitu gabeko misterioak. Hortik abiatuta, hitzaldi ederra eskaini zuten Bernardo Atxagak eta Joxan Goikoetxeak joan zen ostegunean Asteasun.

 Ahotsari izena jartzen

 Bertsolaritzan bada mugarri den grabazio bat: 1926an egindakoa. Bi bertsolari entzuten dira kantuan. Orain dela mende laurden agertu zen grabazioa, eta Joxan Goikoetxeak Pablo Zubiarrain "Pablo Txikia" bertsolariarengana jo zuen argibide eske. Grabazioa entzun eta bertsolarietako bat Joxe Manuel Lujanbio "Txirrita" zela argitu zion honek. Bigarren bertsolaria Pedro Jose Elizegi "Pello Errota" zela uste izan da orain gutxira arte, baina osteguneko hitzaldian hipotesi hori baztertu egin zuen Joxan Goikoetxeak. Grabazioa 1926koa izanik ezinezkoa da asteasuarra izatea, 1919an hil baitzen "Pello Errota". Hala, misterioa ikertzen aritu da Joxan Goikoetxea, eta izena jarri dio ahotsari: Joxe Migel Bitoria "Anbuerri".