Eskolartekoa 2018-06-05

Larunbatean Saran jokatuko da Euskal Herriko Eskolarteko finala

 Bukatzera doa aurtengo ikasturtea eta, ikasturte amaierarekin batera, azkeneko txanpan sartu da Eskolartekoa ere. Larunbat honetan Saran jokatuko da Euskal Herriko Eskolarteko finala.

 Zazpi herrialdeetako ordezkaritza
 
 Goizeko 11:00etan hasiko da finala eta zazpi herrialdeetako ordezkariak ariko dira bertsotan. Aitor Ugarte eta Aroa Arrizubieta sailkatu dira Arabatik; Elixabet Etxandi eta Julen Etxeberri Baxenabarretik; Gorka Pagonabarraga eta Iruri Altzerreka Bizkaitik; Oihana Arana eta Aner Peritz "Euzkitze" Gipuzkoatik; Hodei Renteria eta Irati Alcantarilla Lapurditik; Xabat Illarregi eta Ekiñe Zapiain Nafarroatik eta Haritz Capot Zuberoatik.

 Egin beharreko lanak

 Bi atal izango ditu finalak. Agurrak botako dituzte lehenik eta binaka zortziko handian eta txikian egindako ariketen ondoren, sei bertsolari sailkatuko dira azkeneko atalera. Atal honetan bakarka ariko dira bertsolariak.

  Hogeita hamar urte

 1989an jokatu zen lehenengo aldiz Euskal Herriko Eskolartekoa. Urteurrena gogoan izango dute finalean, eta omenaldi bat ere izango da, Mikel Mendizabalek merezitako esker ona jasoko baitu. Bertsolari ezaguna izateaz gain, Ikastolen Elkartean bertsolaritza sustatzaile lanetan aritu da itsasondoarra, eta berak jantziko dio txapela txapeldunari.

 Bazkaria Saran bertan

 Finala bukatutakoan, bazkaria izango da Sarako Lur Berri gelan, eguerdiko 14:00ak aldera hasita, Idokiren eskutik. Eta bazkalostean "Saran`ga" txarangaren doinuez gozatu ahal izango dute bertaratu direnek.