Basarri Bertso Paper Sariketa 2018-09-04

'Sigi-saga'. Angula arrantzari jarritako bertsoak, Basarri Sariko irabazle

'Sigi-saga'. Angula arrantzari jarritako bertsoak, Basarri Sariko irabazle
Ibai Esoain bertsolariak poz handiz hartu Basarri Saria irabazi izana. Sigi-saga sortan, angula arrantzaren kontakizuna egiten du, pertsonaren barne motibazioetan barrena, beregan eragin handia izan zuen osaba Manuelengana hurbilduaz eta baita zenbait kritika eginez ere.

Ibai Esoain bertsolariak poz handiz hartu Basarri Saria irabazi izana. Sigi-saga sortan, angula arrantzaren kontakizuna egiten du, pertsonaren barne motibazioetan barrena, beregan eragin handia izan zuen osaba Manuelengana hurbilduaz eta baita zenbait kritika eginez ere.

Anguletan ibiltzeko zaletasuna du bertsolari oriotarrak eta, hain zuzen, osaba Manuel zenarekin eman zituen lehen pausoak. "Sortaren arima hor dago" aitortu dio egileak Bertsoari: "ez dizu guztiz joaten utzi nahi/baya heltzen ari denak!" dio puntu batean.

Esoainen bertso bidean ere izan zuen osaba honek eraginik: haurra nintzela berarekin joan nintzen lehenengoz Belodromora Euskal Herriko finala ikustera".

Sortu ere, anguletan ari zela ernetako sorta da: "Pentsatzeko denbora asko izaten dugu ta..." bota du ironiaz.

Ibai Esoainek bat-bateko bertsogintzaz gain, bertso antzerkiaren eremua ere asko landu du Inaxito eta BertsolHaritza proiektuekin. Basarri Saria irabazita, sortak idazteko grina berritu egin zaio.

 

Izenburua: Sigi-saga

Egilea: Ibai Esoain Arruti

Doinua: 7 puntukoa (Neska zaharrak eta apaizak)

(Ikusi bideoa)

 

1-Afizioak izaten dira

Arimaren jarabeak

bakoitzak dauzka bereak

Nik maite ditut zira urdinak

Ta katiuska berdeak (bis)

Beiratzen ditut ilargi-aldiak

aztertzen ditut mareak

ur biziak ur bareak

Argi bat diz-diz eramaten det

zer ekarriko sareak

Txitxare batek mugitzen dizkit

sabeleko txitxareak. (bis)

 

2-Ahots zakarra ta esku finak

osaba Manuel zenak

gogoan dauzkat eszenak

“baya bat egin behar diagu"k

sortutako sentipenak (bis)

"erdoil gabea behar dik uztaiak,

arin xamarra kertenak"

Zure aholku-ordenak

baliatzen ta gordetzen ditut

denak ez bada gehienak...

Ez dizu guztiz joaten utzi nahi

Baya heltzen ari denak! (bis)

 

3-Pozoia sartu zitzaidanetik,

arrantzarako zirrara

Mermarik ez dauka hara!

ur azalari kilikilika

joaten zait negu bolada (bis)

Loari ordu lapurtzen nabil

bihotzkadaz bihotzkada,

lupitu egiten gara!

Askatasunak eramaten nau

herrio bazterretara

Ta angularik suertatzen bada

Tasun gabe askara (bis)

 

4-Zaparrada bat, hil betea ta

lagun baten abisua

hartzeko konpromisua

beti barruan eduki arren

huts egiteko izua. (bis)

Ezereza da porrota eta

gutxi ere berdintsua

kilo bat paradisua,

lekua non ta gramoak zenbat

gure borroka itsua!

Zeinek neurtzen du, nola neurtzen da,

Nigan daukazun pisua? (bis)

 

5-Argalxeago, gizenxeago,

edertasun bera bait du!

ilargiari bi aipu

ur korronteak urduritzen nau

ta izarpeak lasaitu (bis)

Loiak bi hankak sustraitzen dizkit

euriak hileak blaitu

baina ez nadin gogaitu

Chester bat piztu bayari heldu

eta lanean jarraitu,

Harrapakin ta harrapakari

tabakoak hilko gaitu! (bis)

 

6-Tximista argien desafioei

trumoi batek dardario

Gauari hotza dario

Nola angulak hala ni ere,

biok mukiak jario (bis)

segaren ordez baya hartuta

setati nabil herio

koxka jetxi koxka iyo

kosk egin nion amu hura det

afizio- kalbario

Baina sardexka Gaztelubiden

beste batek sartzen dio (bis)

 

7-Gauez. arrastan, zaldi-karreran,

Pelagikoaren pauta!

Ez polainean arraunka

Hegaluzeak amuka eta

Txitxardinak hamalauka (bis)

bazterrekoen penitentzia

motorzalearen mauka

indartuz doa arauka

Heltzen da gaua hasten da gerra

harriak tankeen aurka

Sareak libre dabilzkienak

Sarekadarik ez dauka! (bis)

 

8-Aingurak gora eta ingura,

Aingira behar zutenak!

Bistan daude erretenak!

Bazkari nola neurriak jarri

Bozkak behar dituenak (bis)

Analisiak, proposamenak,

ardurak ta ahalmenak

dira politikoenak

Nork eskuratu lizentziak ta

nori ukatu baimenak

Sigi-sagako errekak baina

erantzunkizun zuzenak! (bis)