Batzar Nagusia 2019-04-11

Herrialdeetako Bertsozale Elkarteak, ilusioz eta proiektuz gainezka

Apirilaren 6an Berrizen egindako Bertsozale Elkarteko Batzar Nagusian herrialdeetako arduradunek ere hartu zuten hitza. Banaka elkarrizketatu ditugu tokian tokiko Bertsozale Elkarteetako lehendakariak: Arabako Ekaitz Elorriaga, Nafarroako Alaitz Rekondo, Xiberoa, Lapurdi eta Baxenabarreko Xumai Murua, Gipuzkoako Saroi Jauregi eta Bizkaiko Asier Ibaibarriaga. 

Bakoitza bere ezaugarriekin, baina, oro har, 2018ak emaitza onak utzi ditu herrialdeetan, eta 2019a emaitz on horiek egonkortzeko urtea izan dadin nahi dute. 

Transmisioan eta sustapenean buru-belarri

Herrialde guztiek nabarmendu dituzten bi ardatzak dira transmisioarena eta sustapenarena. Araban "bertsogintza aktibatzen eta dinamizatzen" jarraitzeko asmoa dutela esan du Ekaitz Elorriagak; Nafarroan, "hezkuntza arautuan geografikoki zabaltzeko" erronkari helduko diotela adierazi du Alaitz Rekondok, eta horretarako A ereduko ikastetxeetara iristeko froga pilotu bat ere prestatu dute.

Xiberoan, Lapurdin eta Baxenabarren XILABA Txapelketa, banakako izatetik, taldekako izatera igaro zen iaz. "Aurrerapausu bat" izan dela uste du Xumai Muruak. Gipuzkoako Taldekako Txapelketari esker bertsolari, gai-jartzaile, epaile eta antolatzaile berriak gerturatu dira banakako Gipuzkoako Txapelketara, Saroi Jauregik esan duenez, eta bide horretan segi nahi du Bizkaiak ere, taldekako eta banakako txapelketak txandakatzen, elkar osatu dezaten.