AGURRA 2019-04-27

Patxi Iraola bertsolaria hil da

Patxi Iraola (1933-2019) Zaldibiako "Olegi" baserrian jaio zen. Zenbait txapelketatan parte hartu duen bertsolaria izan da, Osinalde elkarteko Saria (1971) eta Zepai Saria (1974) eskuratu zituen tartean, baina gehienbat lagun arteko saioetan kantatu izan du. Ateraldi handikoa eta erantzule zuzena izateagatik oroituko dute askok. Hona hemen Goierritarrak talde gisa egindako bertsoaldi bat.

Goierri inguruan bertsolaritzaren hazia ereitearren eta hainbat bertsolari gazteren bultzatzaile izatearren, omenaldi bat egin zieten Patxi Iraolari eta Florentino Goibururi 1991an. Hainbat bertsolarik hartu zuten parte eskaintza hartan, eta bertso honen bidez eman zituen eskerrak Iraolak. Argia astekariak bien arteko elkarrizketa bat ere argitaratu zuen bere garaian. 

Bere ibilbidea, liburuan

Duela hamar urte "Naizen apurra" izeneko liburuan bildu zituen Patxi Iraolak bere bizitzako kontaketak, bertsoak eta pentsamenduak, Rufino Iraolak eta Joxemari Iriondok lagunduta. 

Astelehenean emango diote azken agurra bertsolari zaldibiarrari.