bertso udalekuak 2019-07-30

Amaitu dira Aubixako eta Orioko txandak

Amaitu dira Aubixako eta Orioko txandak
Ia aldi berean egin dira hamar eguneko bi txanda hauek: uztailaren 17tik 26ra bitartean Aubixakoa, eta 20tik 29ra bitartean Oriokoa. Honenbestez, abuztu amaierako Zuhatzako txanda baino ez da geratzen.

Aubixan 15-16 urteko gazteak elkartu dira aurten, eta ez dute aspertzeko betarik izan. 

Ibilaldiak egin dituzte Elgoibarko San Pedro auzora, Zarautzera eta Arratera. Lehenean, herri kirolak egin zituzten; bigarrenean, bisita gidatu musikatua Paul Beitiaren eskutik; eta, Arraten, hango irrati ezagunean hitz eta pitz aritu ziren.

Aubixako aterpetxean geratu direnetan ere, gonbidatu bereziak izan dituzte: Xabi Payak euskal ahozko tradizioaren inguruko hitzaldia eskaini zien, eta ondoren esandakoari loturiko dinamikak gauzatu zituzten; Miren Narbaiza Mice musikaria agertu zitzaien, eta kontzertua eskaini; eta Napardeath ikus-entzunezko proiektua ere aurkeztu zitzaien gazteei.

Bertso alea Iñaki Viñasprek eta Nerea Elustondok jarri zuten bart; han izan ziren bi bertsolariak Aubixako bertso udalekuari azken puntuak jartzen.

Portuz portu Orion

Egun bakoitzeko "portu" batean lehorreratu dira 17-18 urteko gazteak Orioko Itxaspe baserrian. Goizero itsasoak ekarritako botila bat hartu, eta hari kortxoa aterata, egun horretan gai izango zuten mezua irakurri dute, Goseren "Txalupa" kantua abestearekin batera: X portua, Fantasiaren portua, USB portua, Orioko portua... 

Dena ez da Itxaspera mugatu, ordea. Eguraldia lagun, hondartzaz gozatzeko aukera izan dute, eta Rosi Lazkanok bisita gidatua egin zien herrian zehar, bertako txoko esanguratsuak eta Orioko historia aurkeztuz, bereziki emakumeek jokatutako papera. Egun euritsuak baliatuz, "Francoren bilobari gutuna" antzezlana ere proiektatu zuten Itxaspen, eta "Txabela Bragas" emanaldia eskaini zieten Amaia eta Leire Caberok.  

Bi bertsolariren bisita ere izan dute, ohi bezala: Eli Pagola eta Igor Elortza gerturatu ziren Oriora. 

Txanda bakoitzeko laburpen bideoak ikusgai izango dira irailean Bertsoa.eus-en. 

Albiste gehiago

Jone Larrinaga Dañobeitia - Bertsolari Bertsozale Podkasta 2024-03-28

«Bertsolaritzaren garapena aberatsagoa da espektatibarik gabe»

Mikel Artola Izagirre - Gipuzkoako Bertsozale Elkarteko koordinatzailea 2024-03-26

«Gipuzkoan 10-50 urte bitarteko bertsolari ia denek kantatuko dute udaberrian»

Juanjo Uria Zubiarrain - Bertsolari bertsozale podkasta 2024-03-15

Juanjo Uria: bertsoa eragiletzatik eta pasiotik bizi duen hernaniarra

Araitz Katarain, Izaro Bilbao eta Janire Arrizabalaga - elkarrizketa 2024-03-13

«Bertso munduratze prozesu horretan sortzen diren gatazkak gorpuztuko ditugu, mimoz, arduraz eta umorez»

Larunbat gauean 21:00etan ETB1en 2024-03-07

Hitzetik Hortzera Xabier Rico Arabako txapel emailearekin