None 2020-10-08
Zirtoa, ateraldia edo ditxoa. Pasadizo umoretsuetan agertu ohi den bat-bateko erantzun laburra da zirtoa, erriman oinarritu ohi dena. Ahozko genero hau balioan jarri nahi du Aiztondoren zirtotsa. Aiztondoko zirto tradizioa eta aplikazio didaktikoa lanak: Aiztondo bailarako (Gipuzkoa) zirto tradizioa bildu, aztertu eta berau ikastetxeetan eta bestelako hezkuntza espazio zenbaitetan irakasteko proposamena egin dute proiektuaren egileek, Harituz Tolosaldeko Bertsozaleen Elkarguneko kideek.
Pasa den ostiralean lanaren nondik norakoak azaldu zituen Haritz Mujika Harituzeko kideak. Proiektuak Pello Mari Otaño beka eskuratu du, eta deialdiaren ebazpena aurkezteko ekitaldia egin zen Zizurkilen. Zirtoaren inguruko azalpenak eta hura lantzeko ikastetxeentzako egin nahi den proposamena are gehiago argitzeko, zenbait adibide ekarri zituzten Oihana Iguaranek eta Unai Mendizabalek; hiru kide hauekin batera egin dute lana Beñat Iguaranek, Imanol Artolak eta Mikel Artolak.
Elkarlanaren eta auzolanaren adibide ezin hobea
Ekitaldian izan ziren deialdia antolatu eta babestu duten erakunde eta elkarteak: Kilometroak Kultur Elkarteak eta Mintzola Ahozko Lantegiak antolatu dute deialdia, Amasa-Villabonako eta Zizurkilgo Zubimusu Ikastolaren eta Zizurkilgo Hernandorena Kultur Elkartearen babesarekin.
Kilometroak jaiaren aldeko bertso saioa
Kilometroak Astearen baitan, Zirtotsak bertso saioa antolatu zuten Kilometroak Kultur Elkarteak aurkezpenaren ondoren. Amaia Agirrek jarritako gaiei erantzuten aritu ziren, Amets Arzallus, Anjel Mari Peñagarikano, Haritz Mujika, Maialen Lujanbio eta Oihana Iguaran bertsolariak, 19:00etan hasita, Zizurkilgo Intxaur frontoian.
Laster izango dira bertsoaldiak bertsoa.eus atarian.
Anonyme Popularren agurreko kontzertuak maiatzean eta ekainean 2024-04-18
Maddi Aiestaran Iparragirre - Osinalde Sariko balorazioa 2024-04-08
Jone Larrinaga Dañobeitia - Bertsolari Bertsozale Podkasta 2024-03-28
Mikel Artola Izagirre - Gipuzkoako Bertsozale Elkarteko koordinatzailea 2024-03-26
Juanjo Uria Zubiarrain - Bertsolari bertsozale podkasta 2024-03-15