Bertsoaroa 2020 2020-11-10

'Koplariak koplari' hitzaldi musikatua eta gazteen saioa aste honetan

Gaur 'Koplariak Koplari' hitzaldi musikatua eskainiko dute Xabier Amurizak eta Agus Barandiaranek. Amurizak azken hamarkadetan bildu eta sortutako koplak hartuko ditu oinarri, entzulegoari koplek herri musikan izan duten eragina azaltzeko. Saioa 19.00tan hasiko da Kondestableko Areto Nagusian. Ateak ekitaldia hasi baino ordu erdi lehenago irekiko dira eta aforoa mugatua izango da, aretoak baimentzen dituen tokiak bete arte. 

Bihar gazteen bertso saioaz gozatzeko aukera izango da Katakraken. Hau ere iluntzeko zazpietan hasita eta kantuan Aner Peritz "Euzkitze", Ekhiñe Zapiain, Endika Legarra, Maite Sarasola, Oihana Arana eta Xabat Illarregi. Gai-jartzaile lanetan arituko da Ainhoa Aranburu. 

Nafarroako Bertsozale elkarteak eta Iruñeko Udalak antolatzen duten Bertso Aroa zikloaren baitan hainbat saio eta ekitaldi antolatu dira azaroaren 26a bitarte, beti ere behar diren neurri guztiak betez, aforo mugatuekin eta erantzukizunez jokatzeko deia eginez. Bertsoa.eus atarian jarraipen berezia egingo da datozen asteetan zehar.