Bideo Kopla Lehiaketa 2020-12-16

Bideo-kopla lehiaketaren azken txanpa

Kopla lehiaketa, azken txanpa iritsi da. Araba osoko 14 urte arteko 1.000 partaidetik gora izan ditu bideo-kopla lehiaketaren lehen edizioak."Ikasturte xelebrea" gai hartuta, bakarka, bikoteka, taldeka edo kuadrillan grabatu dituzte beraien buruak bertsotan. Alea.eus webgunean, bideo-kopla lehiaketak duen atal berezian, duzue bideoak ikusi eta zuen bozka emateko aukera. 

Bertso saioa eta sari banaketa

Lehiaketari amaiera emateko, bihar, abenduaren 17an, bertso saioa antolatu da Gasteizko Jimmy Jazz aretoan, 18:00etan. Bertan izango dira bertsotan Andoni Egaña, Aroa Arrizubieta, Oihane Perea, Peru Abarrategi eta Irati Anda bertsolariak, Uxue Diaz de Cerio gaijartzailearen agindutara, eta Unai Mendibil eta Xabi Lasaren laguntzarekin.

Saioa ikusteko sarrera doakoa da, baina segurtasun neurriak bermatze aldera, ikusle kopurua mugatua egongo da, eta beharrezkoa izango da aldez aurretik gonbidapena eskuratzea. Gonbidapenak Jimmy Jazz aretoaren webgunean eskuratu ahalko dira, agortu bitartean, abenduaren 17a arte.

Bertaratzeko aukerarik ez duenak, saioa online ikusteko aukera ere izango du, streaming bidez alea.eus webgunean.