bertso urtie 2021-03-19

'Bertso Urtie' egitasmoa, Erniarraitzen eskutik

Urola Erdia eskualdean antolatzaile nagusia izan da Erniarraitz beti, eta bide horretan eragiteko helburua du "Bertso Urtie" egitasmoak. "Pandemiak plazan izan dituen ondorioak ikusita garbi genuen aurten saiakera berezi bat egin behar genuela plazako jardunean eragiteko. Bertsolariei kanturako aukera gehiago eskaintzeko batetik, eta inguruko antolatzaileak antolatzera animatzeko bestetik".

Esan bezala, martxoaren 28an izango da hurrengo saioa, Zestoako kiroldegian. Sustrai Colina, Andoni Egaña, Jon Gurrutxaga, Oihana Iguaran, Maialen Lujanbio eta Jon Maia arituko dira kantuan. Orain arte 3 saio antolatu dituzte. Azaroaren bukaeran ekin zioten bideari eta aurreneko saioa Azkoitian izan zen, abenduan antolatu zuten bigarrena, Azpeitin, eta urtarrilean "Bertso jasa, bat-bateko jolasa" emanaldia Errezilen. Balorazio positiboa egin dute Erniarraitzeko kideek orain arteko ibilbideaz: "Balorazio oso positiboa, entzuleak inoiz baino hobeto erantzuten ari dira eta bertsolarien ahalegina ere eskertzekoa, ez baita erraza neurri hauekin plazak goxatzea, eta lortu dute". 

Otsailean "eskualdeko herrietan zegoen egoeragatik (gorrian eta kulturguneak itxita)" ezin izan zuten ezer antolatu, baina aurrera begira dinamika honekin jarraitzeko asmoa erakutsi dute: "Oraingoa bertso jaialdi bat izango da baina datozen hilabeteetarako formatu desberdinetako saioak antolatzen ari gara: bertso bazkaria, bertso saio musikatua… Txandaka Erniarraitzek bere baitan hartzen dituen 4 herrietan antolatuko ditugu. Egitasmo honetarako diru laguntza berri bat lortu dugu eta aprobetxatu egingo dugu".