Goierri eskualdeko bertsolaritza ikertu nahi?

Goierri eskualdeko (Gipuzkoa) ahozko ondarea ikertzeko aukera paregabea eskaintzen du Kilometroak Kultur Elkarteak eta Mintzola Ahozko Lantegiak deitutako ikerketa bekak; tartean, noski, bertsolaritza ere ikertu ahal izango da, kantu, ipuin, atsotitz eta ahozko ondare diren beste alor batzuen antzera. 3.000 euroko saria emango zaio hautatutako proiektuari, eta ikertzaileak urtebeteko epea izango du proiektua garatzeko.

Ekainaren 30era arte aurkeztu ahal izango dira proiektuak; hemen topatuko dituzue deialdiaren inguruko xehetasunak.

Horrela, Pello Mari Otaño Ikerketa Bekak abiatu zuen bideari jarraipena emango zaio 2021ean. Orduko hartan Aiztondo bailarako (Gipuzkoa) ahozko ondarea zuen helburu deialdiak, eta Harituz Tolosaldeko Bertsozaleen Elkarguneak osatutako Aiztondoren zirtotsak proiektuak eskuratu zuen saria. Aurtengoan, Goierri eskualdera mugituko da Kilometroak, eta antolatzeko ardura hartu duten Beasaingo Andramendi, Ordiziako Jakintza eta Lazkaoko San Benito ikastolen babesa izango du bekak.