Sagardoak Elkartzen Gaitu 2021-06-29

Gazte talentua protagonista

Sagardoak elkartu ditu berriro ere Gipuzkoako Sagardogileen Elkartea, Musika Bulegoa eta Bertsozale Elkartea. Gipuzkoako zenbait sagardotegi agertoki direla, bertso saioak eta musika kontzertuak antolatu dituzte elkarteok Sagardoak Elkartzen Gaitu ekimenaren baitan, bigarren urtez jarraian. Gaur aurkeztu dute Irungo Ola sagardotegian uztailerako eta abuzturako prestatutako egitaraua. 

Azken urtean, pandemia garaian, sortzaile gazteek plazan kantuan aritzeko izan dituzten zailtasunak aintzat, gazte talentuari egin nahi zaio tartea emanaldiotan. Uztailaren 9an, 16an eta 23an izango dira bertso saioak, Aburuza, Iparragirre eta Astarbe sagardotegietan; era berean, hiru musika emanaldi ere antolatu dira.

Ekitaldi guztiak 19:00etan izango dira, eta, eguraldiak laguntzen badu, kanpoan egingo dira. Bi aukera daude saio hauetara joateko: 15 euroko sarrerarekin emanaldia, sagardo tragoa eta pintxoa eskuratu ahal izango dira; 39 eurokoarekin, afaria gehitzen zaio.

Bertso saioetarako sarrerak www.bertsosarrerak.eus atarian eskura daitezke.

SAGARDOAK ELKARTZEN GAITU - Bertso saioak:

• Uztailak 9, 19:00. Aburuza Sagardotegia: Andoni Mujika, Ane Beloki, Ane Zuazubiskar eta Maialen Akizu
• Uztailak 16, 19:00. Iparragirre Sagardotegia: Ane Labaka eta Aner Euzkitze
• Uztailak 23, 19:00. Astarbe Sagardotegia: Asier Azpiroz, Eli Pagola, Iker Ormazabal eta Maide Garmendia