Xiberua, Lapurdi eta Baxenabarre 2022-01-11

Bertsularitzaz gozatzeko prest dator urtarrila

Bertsularitzaz gozatzeko prest dator urtarrila
Joan den urte amaieran XILABAk Ipar Euskal Herriko bazterrak busti ondoren, bertsu eskaintza zabala prestatu dute datozen egun eta asteetarako. Hendaian, Azkainen, Suhuskunen eta Senperen izango dira saioak.

Iragan berri den udazken txapelketatsuak bertsolaritza lehen lerroan jarri du eta pandemiak baldintzatutako garai hauetan sortutako su horri jarraipena eman nahi dio Bertsularien Lagunak. Txapelketaz gain beharrezkoak dira jaialdi, otordu zein bestelako bertso saioak; eta Ipar euskal Herrian bertsoez gozatzeko aukera bat baino gehiago izango da ondorengo egun eta asteetan.

  • Larunbatean, hilaren 15ean, Harrera elkartearen aldeko bertsu saioa izango da Hendaiako Gaztelu aretoan. Ipar Euskal Herriko Harrera elkarteak eta Baleak elkarteak elkarlanean antolaturiko saioa 17.00etan hasiko da eta kantuan arituko dira Unai Iturriaga, Maddalen Arzallus, Julio Soto, Amets Arzallus, Maddi Ane Txoperena eta Odei Barroso. Gai emailea, berriz, Aimar Karrika izanen da. [Saioaren aurretik bazkaria egitekoa zen baina osasun egoerak baldintzatuta azkenean bertan behera gelditu da bazkaria]. Sarrera lortzeko +33 618 67 66 15 telefonora deitu edo iparharrera@gmail.com helbidera idatz daiteke, urtarrilaren 11 azken epea.
  • Igandean, Azkainen izango da saioa. Arratsaldeko 17.00etatik aurrera Amets Arzallus, Xumai Murua eta Maddi Ane Txoperena arituko dira bertso kantari Biltoki gelan. Sarrerak egunean bertan edo Herriko Etxean erreserba eginda +33 559 54 66 89 zenbakira deituta.
  • Hurrengo asteburuan, urtarrilaren 22an, Suhuskuneko herriko gelan Jon Maia eta Patxi Iriart arituko dira bertsotan. Ortzaizeko Ikastolaren eskutik, eta Bertsularien Lagunak eta EKErekin lankidetzan, sagardotegi menua izango duen afaria eskainiko da eta bertsoek jantziko dute ondorena. Saioa 21.00tatik goiti hasiko da bertso afaria. Izena emateko deitu +33 677 45 82 26 zenbakira.
  • Azkenik, urtarrila itxiko du hilaren 29an Senpereko Larraldea baserrian izango den bertso saioak. Kantuan arituko dira Julio Soto eta Amets Arzallus arratsaldeko 17.00tatik aitzina. Lapurdi 1609 elkarteak antolaturik, eta EKEk nahiz Senpereko Herriko Etxeak lagundurik.

Haizea Dator ekimena

Gogoratu bestalde, Haizea Dator ekimena martxan dela aurten ere: Lapurdi, Baxenabarre eta Xiberuako bertsu eskoletako ikasleei eta bertsulari gazteei plaza bat ematea du xede egitasmoak. Hilabeteko lehen ostiral guziz, izaten ari dira saioak.

Azaroan Lexantzün eta abenduan Hendaian burutu ondoren, tamalez, urtarrilean Itsasun izatekoa zena bertsan behera gelditu zen osasun egoera dela eta. Espero dezagun hurrengo hilabeteetako siaoak aurrera ateratzeko moduan izango direla. Baionan, Urruñan, Baigorrin eta Saran izango dira hurrengoak, hurrenez hurren.