BBK Saria 2008-02-20

Ipar Uribe eta Busturialdea nagusi BBK Sariko lehen bi saioetan.

Atzo hasi zen aurtengo sariketa Igorren eta gaur bigarren saioa jokatu da Busturialdeko Arratzun.

Sariketa honetan parte hartzen duten 6 taldeak, 3 taldeko multzo bitan banatzen dira eta liga bat jokatzen dute haien artean.

Aurten egin diren multzoak hauexek dira:
• 1.- BILBOALDEA, BUSTURIALDEA eta DURANGALDEA
• 2.- ARRATIA, IPAR URIBE eta LEA ARTIBAI

Talde bakoitzak saio bitan kantatzen du, bata “etxean” (euren eskualdeko ikastetxe batean) eta bestea “kanpoan”. Bertsolarien adina kontuan izanik, ahal izanez gero, saioak ikastetxeetan egiten dira, bertsolariak babestuta eta euren giroan sentitu daitezen. Honela, astero saio bi egiten dira eta komunikazio honetan atzo eta gaur jokatu diren saioen berri ematen dizuegu.

Saioetako aurkezlea Maite Berriozalbal izan da eta epaimahaia hiru aditu hauek osatu dute: Juanjo Respaldiza, Arkaitz Estiballes eta Jose L. Basterretxea.

Atzo otsailak 19, egin zen lehenengo saioa, Igorreko institutuko aretoan, Arratiko eta Ipar Uribeko taldeen artean, aretoa bete-bete egin zuten ehun bat ikusleren aurrean. Saioa maila handikoa izan zen, puntuazioak erakusten duen moduan eta ikusleek oso ondo pasatu zuten. Hauexek izan ziren kantatu zuten bertsolari gazteak eta lortutako puntuazioak:

 ARRATIA eta IPAR URIBE
18 urte arte Illart Gumuzio, Irati Astondoa, Irati Bernaola, Imanol Uria, Maialen Markaida eta Jone Uria

19-24 urte bitarte: Manex Sagarna, Joseba Bilbao, Iñaki Iturriotz Arrate Illaro, Peru Vidal eta Itsaso Paya

                                   ARRATIA             IPAR URIBE
18 urte arte                  148,                      175,
19-24 urte                    235,5                   248,
Guztira                          383,5                   423

Beraz, iazko talde txapeldunak, Ipar Uribek, lortu du aurtengo sariketako lehen puntua.

Gaur jokatu da bigarren saioa, Busturialdeko eta Durangaldeko taldeen artean, Arratzuko  Barrutialde ikastetxeko aretoan eta hemen ere ehun bat ikasle batu dira. Lehiatu diren bertsolariak eta lortutako puntuazioak hauexek dira:

 BUSTURIALDEA  eta DURANGALDEA
18urte arte: Nagore Beitia, Inazio Vidal, Aitor Beitia, Ander Aldazaba, Aitor Urien eta Miren Amuriza

19-24 urte bitarte: Amaia Aurrekoetxea, Olatz Ibarluzea, Ander Elortegi, Jon Ander Urkiaga, Enea Pinillos eta Eñaut Uruburu.

                       BUSTURIALDEA               DURANGALDEA
18 urte arte         146,5                                    142,5
19-24 urte             217                                     219,5
Guztira                363,5                                       362

Beraz, sariketako lehen saio biak jokatu eta gero, puntu bana irabazita aurrea hartu duten taldeak Ipar Uribe eta Busturialdea dira.