Nerea Ibarzabal eta Miren Amuriza 2022-05-04

Bertsolaritza Madrilgo Complutense Unibertsitatean

Nerea Ibarzabalek eta Miren Amurizak bertsolaritza Madrilgo Complutense Unibertsitatera eramango dute ostiral honetan. Unibertsitate horretan euskara ikasten ari diren ikasleei zuzendutako saioa izango da eta Karlos Cid Complutenseko Euskara irakaslearen eskutik dator ekimena.

Bertsolaritza kokatu eta bertsolaritzaren historian feminismoaren mugarriak
Ibarzabalek eta Amurizak unibertsitatean euskara ikasten ari diren ikasleei bertsolaritza kokatzeaz gain, bertsolaritzaren historian feminismoak izan dituen mugarriak aletuko dituzte eta mugarri horietako bertso esanguratsuenak kantatu ere bai, testigantza gisa. Horrez gain, bat-batean ere arituko dira ikasleek jarritako gai eta ariketen inguruan.