Abadiñon jokatu zen zapatuan 2022-06-27

Janire Arrizabalaga 'txapalatadun' Durangaldeko Kopla Txapelketan

Janire Arrizabalagak irabazi du VII. Durangaldeko Kopla Txapelketa, Erika Lagomarekin buruz burukoa jokatuta. Gernikarra dugu beraz aurtengo txapalatera eta Alaitz Areitiok eman zion garaikurra, txapalata. Abadiñoko Mendiola auzoan jokatu zen finala zapatuan, afalondoan. Kantuan: Eneko Abasolo Abarkas, Ander Aldazabal, Iruri Altzerreka, Janire Arrizabalaga, Aitor Bizkarra, Ander Elorriaga, Erika Lagoma, Araitz Katarin, Peru Madalena eta Bittor Salterain. Publikoak hala erabakita, bigarren fasera igaro ziren Madalena, Lagoma, Arrizabalaga eta Bizkarra.

Buruz-burukoan Erika Lagoma eta Janire Arrizabalaga aritu ziren. Bi ofizio eta kartzelako ariketa izan zituzten zeregin, Ainhoa Urien gai-jartzailearen aginduetara. Azkenean, Arrizabalaga gernikarra izan zen irabazlea.