Txapelketa Nagusia - Finalaurrekoak 2022-11-17

Bigarren itzulian bertso bat gutxiago eta bost ganbaran

Bigarren itzulian bertso bat gutxiago eta bost ganbaran
14 bertsotik 5 ganbarako lanean botako dituzte bertsolariek. Bina punturi erantzun beharko diete lehenbizi eta gai bati hiru bertso kantatu jarraian. Orain arte 700 puntuko langa zena, bigarren itzuli honetan 653 puntukoa izango da.

Jexux Mari irazu

Finalaurreko bigarren itzuliak aldaketak datartza bai bertsolariek egin beharreko lanetan eta baita bertso kopuruan ere. Amurrion, Baionan eta Bilbon bertsolariek 14na bertso puntuagarri kantatuko dituzte, kanporaketetan eta finalaurreko lehen itzulian baino bat gutxiago. Horrek gure puntuaketa eskala mentala ere aldatu beharra ekarriko du. Orain arte 700 puntuko langa zena, bigarren itzuli honetan 653 puntukoa izango da. Eskala horretan, Alaia Martinen 729,5 puntuak 680,5 lirateke. Finaleko zazpigarren txartela, berriz, (Amets Arzallus 688) 642 puntutan geldituko litzateke, lehen itzulian.

Bost bertso ganbarako lanean
Bada beste aldaketa nabarmen bat ere aurreko faseetatik: 14 bertsotik 5 ganbarako lanean botako dituzte bertsolariek. Bina punturi erantzun beharko diete lehenbizi eta gai bati hiru bertso kantatu jarraian. Horiez gain, hiru ofizio egin beharko dituzte. Hamarreko txikian hasi, zortziko handian gero eta zortziko txikian amaitu. Hortik, ganbarako lanera.

1.330 puntutik gora finalean sartzeko
Lehen itzuliak 41,5 puntuko tartea utzi du finaleko postuetan sailkatu diren zazpi bertsolarien artean. Alaia Martinek jarri du goiko langa 729,5 punturekin eta Amets Arzallus dago zazpigarren postuan, 688 punturekin. Mugan, gauzak estuago daude. Bost bertsolari daude 16,5 punturen barruan.

Lehen itzuliko zazpigarren sailkatuaren puntuaketa aintzat hartu eta beste horrenbeste behintzat egin beharko dela aurresuposatuta, 1.330 puntu inguruan egon liteke finaleko langa. Azken bi txapelketetan 1.318 puntutan egon da langa hori.

Azken estatistika datu bat: 2017ko eta 2013ko Txapelketa Nagusietan lehen itzulian finaleko postuetan sailkatutako zazpi bertsolaritik sei sartu ziren finalean. 2017an Agin Laburu gelditu zen kanpora, lehen itzulian 694 puntu eta zazpigarren postua eskuratuta. Unai Agirrek eman zuen jauzia orduan, Iruñean, azken finalaurrekoan. 2013an Unai Agirrek berak ezin izan zion eutsi lehen itzuliko zazpigarren postuari. Unai Iturriaga sartu zen top zazpian, lehen itzuliko emaitza iraulita. 

Albiste gehiago

Jone Larrinaga Dañobeitia - Bertsolari Bertsozale Podkasta 2024-03-28

«Bertsolaritzaren garapena aberatsagoa da espektatibarik gabe»

Mikel Artola Izagirre - Gipuzkoako Bertsozale Elkarteko koordinatzailea 2024-03-26

«Gipuzkoan 10-50 urte bitarteko bertsolari ia denek kantatuko dute udaberrian»

Juanjo Uria Zubiarrain - Bertsolari bertsozale podkasta 2024-03-15

Juanjo Uria: bertsoa eragiletzatik eta pasiotik bizi duen hernaniarra

Araitz Katarain, Izaro Bilbao eta Janire Arrizabalaga - elkarrizketa 2024-03-13

«Bertso munduratze prozesu horretan sortzen diren gatazkak gorpuztuko ditugu, mimoz, arduraz eta umorez»

Larunbat gauean 21:00etan ETB1en 2024-03-07

Hitzetik Hortzera Xabier Rico Arabako txapel emailearekin