Joanes Illarregi - Elkarrizketa 2023-03-21

«Plazako bertsokeratik ahalik eta gertuen egitera joan nintzen txapelketara eta uste dut lortu nuela»

Joanes Illarregi Marzol (Leitza, 1999) Txapelketa Nagusiko finalean bertsotarako izan zuen lasaitasun eta aldarte librearekin gelditu da bereziki. Txapelketa osoko ia aldarte onena sentitu zuen Nafarroa Arenan, Elizondokoaren batera. Bilbo izan zuen ifrentzua. Finalean bertsotan plazako moldean aritzera joan zen eta lortu duelakoan dago. Bertsoaldi bat apartatzeko eskatuta, bi ekarri ditu: goizean sei puntuko motzean Aitor Mendiluzerekin egindakoa eta arratsaldean, hamarreko txikian Beñat Gaztelumendirekin osatua aukeratu ditu, horiek izan zirelako berak bertsotan bilatzen duenera gehien hurbildu ziren lanak.

Liseriketa gogorra
Finalean egindako lanarekin gustura gelditu arren, final ondorenak badu bertsolarientzat gogorretik ere, eta halaxe egin zaio Leitzako bertsolariari ere. Final ondorengo liseriketarena entzuna zuen baina ez zuen uste «horrenbesterako zenik». Esperientziak baiezkoa erakutsi dio. Berriro indarrak bilduta eta gustura dabil plazan Illarregi.



Txapelketa ondorena, finalaren eguna, hasi aurreko minutuak nola bizi izan zituen, txapelketako alderik gozoena eta gaziena, bertsolaritza alde laboraletik gazte baten ikuspegitik, plazako irakurketa... Joanes Illarregik testigantza sakona eta zabala utzi du Bertsoa.eus-en.