Txapelketa Nagusia 2009-10-18

Beñat Gaztelumendi nagusitu zen Uztaritzen, orain arteko puntuaziorik handienarekin

 Atzo jokatu zen Euskal Herriko Bertsolari Txapelketa Nagusiko laugarren final-laurdena, Uztaritzeko Kiroleta pilotalekuan. 700 entzule elkartu ziren saioa jarraitzeko. Honela gelditu zen sailkapena:

 1.- Beñat Gaztelumendi  669 puntu
 2.- Arkaitz Estiballes  661 puntu
 3.- Aitor Sarriegi      657 puntu
 4.- Xabi Paya           644,5 puntu
 5.- Unai Muñoa          615,5 puntu
 6.- Erika Lagoma       567 puntu

 Gaiak jartzen Joana Itzaina aritu zen.

Beñat Gaztelumendi saio osoan aritu zen maila onean, eta kartzelan borobildu egin zuen. Bukaeran Bertsoa.com-i egindako adierazpenetan, saioan zehar lasai egon zela aitortu zuen eta hamarreko txikiko lanean gelditu zela gustoen. Arkaitz Estiballes-ek zortziko txikian kantatu zuen bertsorik txalotuenetako bat. Kartzelarako bere burua ondo ikusten zuen eta lanari eustera atera zela adierazi zuen. Aitor Sarriegik zortziko handiko lanean ikusi zuen bere burua ondoen eta finalerdietan bigarren saiora aukerekin iristea du helburu. Xabi Payak ere, sailkapenari begira, pasatzea zuen helburu eta pozik zen. Plazako saioa egitera joan zela esan zuen Payak eta kartzelako gai tipoari buruz, berriz, esan zuen plazan kantatzen ez diren gai-motak direla. Erika Lagomak gorantz egin zuen saioa joan ahala, eta kartzelako lanak asetu zuen gehiena.

 Gauzak horrela, Beñat Gaztelumendi zuzenean sailkatu zen finalaurrekoetarako. Bergarako saioan kantatuko du, Aitor Mendiluze, Maialen Lujanbio eta Etxahun Lekuerekin batera. Gainerakoek puntuazioen zain egon beharko dute.

• 
•