Arabako bertsolari txapelketa 2024 2024-02-12

Aramaion eta Dulantzin jokatuko dira Arabako finalerdiak

Arabako Bertsolari Txapelketak astebeteko atsedena hartu du finalaurrekoei ekin aurretik. Aramaion eta Dulantzin izango dira azken bi saioak. Otsailaren 24an Aramaion eta Martxoaren 2an azken saioa Dulantzin. Larunbatean biak.

Aramaion, Peru Abarrategi, Iñaki Viñaspre, Manex Agirre, Eli Zaldua, Ekaitz Samaniego eta Unai Anda ariko dira kantuan, Etxahun Otañok gaiak jarrita.

Dulantzin, Aroa Arrizubieta, Xabi Igoa, Izar Mendiguren, Asier Otamendi, Aitor Ugarte eta Paula Amilburu, Marta Ugartek gaiak jarrita.

Finala Gasteizen izango da martxoaren 16an Printzipal Antzokian.

Txapelketa jendetsua eta parekatua
Amaitu berri den final laurdenetako fasean Arabako Txapelketako aurtengo edizioak bi ezaugarri nagusi izan ditu: batetik, publiko aldetik harrera beroa izan du eta orain arteko kopuruetatik gora ibili da; bestetik, puntuetan berdintasun handia egon da eta finalera begira ere aukera zabaltasun handia ikusten da. Final laurdenetan lau punturen barruan sailkatu dira lehenengo bost bertsolariak.