Gipuzkoa Bertsotan - Gipuzkoako Txapelketako Sailkapen fasea 2024-05-22

Gipuzkoako sailkapen faseari lehen itzulia #gbtx24_podcast berrian

Andoni Egañak eta Amaia Agirrek Gipuzkoako Txapelketako sailkapen fasean orain artean entzun eta ikusi dutenaz hitz egin dute, Saroi Jauregik puntua jarrita #gbtx24_podcast berrian. Gai orokorretatik hasi eta bertsogintzara artekoak aletu dituzte biek. Aste barruko formatua, ariketak eta ganbara saio erdian kokatzea, bertsogintza, gaiak... Bertso aldetik, saio bakoitzeko lagin bat argitaratu da Bertsoa.eus-en eta bereziki hori hartu zuten aintzat beren gogoetak egiteko.

Gipuzkoako sailkapen faseko lehen itzulian, lau asteburutan 12 saio egin dira ostegun eta ostiraletan. Gehienetan, egun berean bi saio ordu berean eta gai berekin. Eta ondoren, mokadutxoa saioko sentipenak eta iruzkinak partekatzeko giroan. Ariketa aldetik, zenbait aldaketa izan da, bereziki ganbarako ariketa aurreratzea eta azkenaurreko lan bihurtzea. Saio gehienak sarrerak agortuta jokatu dira eta 1.700 lagun bildu ditu Gipuzkoako sailkapen faseko lehen itzuliak.

#gbtx24_podcast berriaren hurrengo atala bigarren itzuliaren ondoren etorriko da. Udazkenean jarraipena izango du.