Patxi Goikolea - Almen bertso eskolako sortzaileetako bat 2024-09-09

«Ikusi genuenean umeek bertsotan ikasten zutela Ikastolen Elkartera joan ginen bertsolaritza eskoletan zabaltzeko»

Gipuzkoako Bertsolari Txapelketako aurkezpen ekitaldian izan zen Patxi Goikolea Apotzagako elkartean, duela mende erdi umeen bertso-eskola sortu eta bertsolaritza hezkuntzan sartzeko pausoa eman zuen taldeko kidea. Goikoleak poz handiz hartu du Gipuzkoako Bertsozale Elkarteak orduko lanari aitortza hori egin izana. Xanti Iparragirre eta Juanito Akizu aipatu ditu bide-lagun. Eta Imanol Murua Gipuzkoako Ahaldun Nagusi ohiaren lana eskertu du bereziki. Xabier Amurizaren Hiztegi errimatua, kartzelatik atera berria, Almen bertso-eskolan baliatu zuten lehenengoz.



Izan ere, duela mende erdi abiatu zena bertso-eskola baten sorrera baino zerbait gehiago izan zen: bertsolaritza eta bertso irakaskuntza ikastetxeetan sartzea proposatu zioten Ikastolen Elkarteari eta hori bideratzen lagundu. Azken finean, gaur egungo transmisioaren bi oinarri nagusiak finkatu zituen duela mende erdi belaunaldi honen bisioak eta lanak: bertsolaritza hezkuntza arautuan irakastea eta zaletasun handiena dutenek bertso-eskolan jarraitzea bidea egiten. Proiektu horren baitan etorri ziren bertsolaritza hezkuntzan lantzeko eta materiala sortzeko bertsolari bat jartzea (Mikel Mendizabal) eta Eskolarteko Txapelketa. Eta, pixkanaka, bertsolaritza Euskal Herri osoko ikastetxeetara zabaltzea.