Zarautzen jokatu zen ostiralean 2024-09-09

Aitor Tatiegik irabazi du Lizardi Saria

Aitor Tatiegi oñatiarrak irabazi du aurtengo Lizardi Saria eta Andoni Rekondo hernaniarra gelditu da bigarren. Ostiralean jokatu zen finala Zarautzen Modelo Aretoan. Amaia Urbietak aurkeztuta. Lan puntuagarriak eginda honela gelditu zen sailkapena, Oihana Aranguren, Unai Muniain eta Leire Beloki epaileen eskutik:

Aitor Tatiegi ------------ 266
Andoni Errekondo ------261
Andoni Mujika --------- 258,5
Libe Goenaga ----------254
Iruri Altzerreka --------242
Araitz Katarain -------- 229

Tatiegik Nahikari Gabilondo bertsolari zarauztarraren eskutik jaso zuen txapela. Lehenengo saria ez ezik, bertso onenaren saria ere oñatiarrak eraman zuen. Bukaerako agurrean Gipuzkoako Txapelketa izan zuen gogoan. «Gaur pozak hartu dit gaina/bigarren denen ordaina» bota zuen lehen puntuetan. Gero berak elkarrizketan aipatu zuenez, aurten sariketetan zazpi aldiz egokitu zaio bigarren izatea eta horren aipua egin zuen agurrean modu finean.

Ez da izan lan bikaina
zuen baimenaz, apaina
gaur pozak hartu dit gaina
bigarren denen ordaina.
Urtarrilean hasi genuen
bertso-eskolen azaña
nahiz lehiaketan bertsogintza den
oso zaila ta labaina
udazkenean hostoak gisan
erori gintezke baina
behin honezkero ikasi dugu
berriz zutitzeko aina.

Bertsoa.eus-ek txapeldunaren hitzak eta bertsoaldi hautaketa zabala eskainiko du astean zehar.