120 lagunetik gora bildu ziren lehenengo hiru saiotan 2024-09-19

Bertsoak plazan eta elkarteetan Bardoetako lehen asteburuan

Nafarroan Bardoak hasi dira kantari. Hiru saio jokatu ziren asteburuan Lesakan, Sunbillan eta Lizarran bertsoa plazara zein elkarteetara zabalduaz. Orotara, 120 lagunetik gora bildu ziren hiru ekitaldietan, giro ederrean.

Ostiralean bi saio izan ziren. Lehena, Lesakako Beheko plazan jokatu zen, eskualdeko Hor gu! eta Erronkari-Iruñerriko Errimaren matxinatuak taldeen artean. Gai-emaile lanetan, Uxue Mesa, Ane Telletxea eta Iratxe Muxika aritu ziren. Ariketa guztiak egin ondoren, Bortzirietako taldeak eskuratu zuen puntua.

Sunbillan jokatu zen ostiraleko bigarren saioa, Ulibeltza Elkartean. Bertan izan ziren kantari Malerrekako Malerreka ez da Baztan taldea (etxeko gisara) eta Irurtzun eta periferiako Pikutara goaz. Gaizka Baigorri, Xuban Etxegia eta Jon Aldabe ibili ziren gai-jartzaile lanetan, eta etxeko taldearentzat izan zen puntua.


Larunbatean, Lizarran jokatu zen saioa, La Bota peñan, Lizarrako Assurancetorurix eta Leitza-Altsasu-Barañaingo Manteleko sobrak taldeak izan ziren kantari, Ekhiotz Prieto gai-jartzailearen aginduetara. Epaileek eta publikoak hala erabakita, talde bisitariak eraman zuen puntua.

Ostiralean beste lau saio
Nafarroako Bardoetako beste lau saio jokatuko dira bihar Lekarozen, Iruñean, Lekunberrin eta Olaztin.