Gipuzkoako Txapelketa - final zortzirenak 2024-10-02

Gipuzkoako final-laurdenetarako azken txartelak Azpeitian

Gipuzkoako Bertsolari Txapelketako lehen fase arrakastsua borobiltzera dator, Azpeitiko kanporaketa. Final-laurdenetarako azken sei txartelak erabakita utziko ditu saioak eta jendetza aurreikus daiteke 500 lagunetik gorako aforoan.

Bertsotan honako sei bertsolari ariko dira, Iker Iriarte Iribarrek gaiak jarrita:

    Aitor Tatiegi Loidi
    Asier Azpiroz Iztueta
    German Urteaga Garmendia
    Haizea Arana Cardenal
    Maialen Akizu Bidegain
    Maider Arregi Markuleta

Epaile lanetan: Bakarne Urreaga Etxeberria, Eneritz Azkue Basurko, Iñigo Legorburu Arregi, Jon Diaz de Mendibil Sarasti eta Zigor Leunda Eizmendi. Idazkari lanetan, aldiz, Aratz Irazustabarrena Garmendia.

Saioko irabazlea zuzenean sailkatuko da final-laurdenetara, eta, saioa amaitzearekin bat emango du Gipuzkoako Elkarteak sailkatutakoen zerrenda osoa ere.

Sailkapena: beheko langa estu
Azpeitiko puntuen baitan, dagoeneko kantatu dutenen artean bost bertsolari daude oraindik matematikoki sailkatzeko aukerekin, 450 puntu bueltako langan. Hurrenkera honetan, Iñaki Apalategi (451,5), Mikel Iturrioz (450,5), Andoni Mujika (450), June Aiestaran (448) eta Manex Mujika (448). Azpeitian kantatuko dutenek puntuazio horiek gainditu beharko dituzte puntuen arabera sailkatzeko.

Final-laurdenetan bost saio, aurreko finalistak barne
Lehenengo fasea pasata, final-laurdenetan aurreko finaleko bertsolariak sartuko dira, fasez pasa direnekin batean. Bost saio izango dira urriaren 19tik azaroaren 3ra. 30 bertsolarik kantatuko dute eta 18 sailkatuko dira finalaurreko fasera.

Dagoeneko talde batzuk ari dira osatzen: Errenterian, esaterako, datorren fasean sartuko den Beñat Gaztelumendirekin batera, Oihana Arana eta Aitor Salegi ariko dira, beren saioak irabazita; Azkotian Eli Pagola, Ane Labakarekin batean; Irunen, Amaia Iturrioz eta Eneritz Artetxe Oihana Iguaranekin batera; eta Tolosan, Andoni Rekondo, Nerea Elustondorekin batean. Azpeitiko irabazleak ere Tolosan kantatuko du.

Sarrerak salgai
Gogoan izan txapelketa guztiko sarrerak eskuragarri daudela www.bertsosarrerak.eus atarian, finalekoak barne.