Bertsolari Txapelketa Nagusia 2026 - Gipuzkoako ordezkaritza 2024-10-09

2026ko Txapelketa Nagusirako 16 txartel jokoan Gipuzkoako final-laurdenetan

2026ko Txapelketa Nagusirako txartel banaketa hastera doa. Datozen bi urteotan Herrialdeetako txapelketan erabakiko dira Nagusirako postuak eta azaroaren 3an erabakita gelditu daiteke Gipuzkoako zein 16 bertsolarik izango duten parte hartzeko eskubidea. Final-laurdenetako fasea amaituta gertatuko da hori, Alaia Martin eta Beñat Gaztelumendi ere finalaurrekoetara sailkatzen badira. Bestela, finalaurrekoak jokatuta erabakiko da 16ko zerrenda.

Nafarroa Arenan kantatu zuten zortzi finalistek jada irabazita dute berriro Txapelketa Nagusian parte hartzeko eskubidea, baina gainerako txartel guztiak herrialdeetako txapelketan erabakitzen dira. Gipuzkoarren kasuan, Alaia Martin eta Beñat Gaztelumendi Txapelketa Nagusirako sailkatuta daude.

Gipuzkoako final-laurdenetan parte hartuko duten 30 bertsolaritik 15 Txapelketa Nagusian parte hartu gabekoak dira.

Egutegia medio, Gipuzkoako Txapelketa da lehenengo txartelak banatuko dituena. Horrek, jakina, plus berezia ematen dio urriaren 19an Eibarren hasiko den faseari. 30 bertsolarik kantatuko dute final-laurdenetan eta 18 sailkatuko dira finalaurreko fasera.

Txapelketa Nagusiko parte hartzaile guztien zerrenda, ondo bidean, 2026ko udaberrian amaituko da, herrialde guztietako txartelak erabakita.