241 herritan eta 547 zentroen sare zabalean 2024-10-09

Bertsolaritza ikasturte berria: 29.000 ume ikastetxeetan eta 1.500 gaztetxo zein heldu bertso-eskoletan

Bertsolaritzak ere ekin dio bete-betean ikasturte berriari Bertsozale Elkartearen eskutik eta bi datu dira azpimarratzekoak. Batetik, hezkuntza arautuan Euskal Herriko osoko 29.000 ikaslerengana iritsiko da ikasturte berrian bertsolaritza: 7 herrialdeetako 241 herritara iritsiko da, 547 zentroen sare zabalean barrena. Ikastetxe publikoak, ikastolak zein kristau eskolak daude bertsolaritza lantzen duten 547 zentroen sare honetan. Bertsolaritza iraskasten Bertsozale Elkarteko 57 irakasle ariko dira.

1.500 lagun bertso eskoletan
Bertso-eskoletako dinamika ere martxan da. 7 herrialdeetako 119 herritan daude bertso-eskolak eta denera 1.500 lagun ariko dira ikasturte berrian. 1.055 haur elkartuko dira asteroko maiztasunez 89 irakasleren eskutik bat-batean trebatzeko. Helduen taldeetan 450 lagun ariko dira entrenatzen zein herriko bertso saioak antolatzen.