Nafarroako Bardoak 2024-10-14

Baztan eta Bortzirietako hiru talde Nafarroako Bardoetako finalera

Nafarrakoako Bardoetako finalaurrekoak jokatu dira asteburuan eta erabakita gelditu dira Gareseko finalean kantatuko duten hiru taldeak: Baztango ‘Baztanzopak’, Bortzirietako ‘Hor gu!’ eta Baztan-Bortzirietako ‘Mutilatuak’. Etxaurin, Irunberrin eta Tuteran jokatu dira finalaurrekoetako bigarren itzuliko saioak.

Etxaurin, udaletxeko ganbaran jokatu zen finalaurrekoetako bat, larunbatean. 20 bat lagun inguruk jarraitu zuten saioa bertatik bertara, giro onean. Parean izan ziren Baztan-Bortzirietako Mutilatuak eta Atarrabia-Barañaingo Argako Bixiguak taldeko  bertsolariak –Eneko Fernandez, Julen Zelaieta eta Urko Gartzia lehenengoen taldean, eta Ander Baiano, Iñigo Aranguren Pika, Martin Berrizbeitia eta Mikel Lasarte bigarrenen taldean-, Iban Garro gai-jartzailearen aginduetara kantuan. Joaneko saioan, urriaren 4an Irurtzunen jokatutakoan, garaipena eskuratu zuten Mutilatuak taldekoek, eta beste horrenbeste egin zuten itzulerakoan.

Irunberrin izan zen larubateko beste finalaurrekoetako bat, Larrainenea Elkartean. 30 lagunen aurrean kantatu zuten Baztango Baztanzopek eta Altsasu-Barañain-Leitzako Manteleko sobrak taldeak. Baztandarren partetik, Alazne Untxalo,  Amaia Elizagoien eta Malen Alzuart aritu ziren bertsotan. Atarrabia-BarañainLeitzarren aldetik, berriz, Ekain Alegre, Eki Mateorena eta Kattalin Lizarraga. Gaijartzaile lanetan Ane Fagoaga aritu zen. Baztandarrek irabazia zuten joaneko  saioa, urriaren 4an Tafallan egindakoa, eta atzo ere Baztanera joan zen puntua.


Launbateko azken finalaurrekoa Tuteran izan zen. 40 lagun inguru bildu ziren Beterri Peñan Iruñerriko EzKrashen eta Bortzirietako Hor gu! taldeen arteko saioa ikusten. Iruñerrikoen partetik, Antton Ciriza, Ion Zendoia eta Josu Sanjurjo, izan ziren kantuan, Bortzirietatik, Estitxu Arozena, Itziar Mitxelena eta Kattin  Madariaga. Gai jartzaile lanetan Eider Azkoaga aritu zen. Joaneko saioan, urriaren 4an Iruñean izandakoan, Bortzirietako taldeak eraman zuen saioa, hala  izan zen larunbatean ere, finalean lekua eginez.

Finala, urriaren 26an
Finala urriaren 26an, Garesen, larunbatez, 17:30etan, Zamariain Pilotalekuan. Sarrerak salgai daude honezkero, www.bertsosarrerak.eus atarian.